Ёрқин Назаров: "Юқори прессинг қўллаганимизнинг сабаби ғалаба қозониш ва лигада қолиш учун ҳаракат эди"

- ОКМК жамоасини ғалаба билан табриклайман. Бизнинг мақсадимиз рақибга жанг таклиф этиш эди. Биз ушбу вазифани бажардик. Йўлнинг ўзида 4-5 соат вақтимизни сарфладик. Шунга қарамасдан йигитлар яхши ҳаракат қилишди. Биринчи бўлимда 4та голли вазиятларга эга эдик. Агар вазиятларимиздан унумли фойдаланганимизда 2-3та гол урган бўлар эдик. Футбол шундай ўйин. Сиз урмасангиз, сизни жазолашади.

- "Турон" жамоаси лигада қолиш имкониятларини яна камайтириб юборди. Жамоа ушбу ҳолатдан чиқиб кета оладими?

- Лигада қолиш учун ҳали ҳамон имкониятларимиз бор. Олдиндаги учта ўйинда ғалаба қозонсак лигада қолишимиз мумкин. Сўнги турга қадар курашамиз.

- Ўйиннинг биринчи дақиқалариданоқ "Турон" юқори прессинг билан ўйнади. Ҳужумчилар Ҳолмуродов ва Азимовлар рақиб ҳимоячиларини анча қийнашди. Ҳолмуродовнинг захирага олинишининг сабаби чарчоқ аломатларими ёки бошқа сабаб борми?

- У чарчаб қолди. Ҳолмуродов тезкор футболчи. Жуманқўзиев эса Ҳолмуродовдан ҳам тезроқ ва шу сабабдан уни майдонга туширдим. Юқори прессинг қўллаганимизнинг сабаби - ғалаба қозониш ва лигада қолиш учун ҳаракат эди.