Янгиариқда янги ўйингоҳ

Халқимизнинг энг улуғ, энг азиз байрами - Мамлакатимиз мустақиллигининг 23 йиллиги арафасида Хоразм вилоятининг Янгиариқ тумани марказидаги “Янгиобод” маҳалласида фойдаланишга топширилган янги спорт мажмуаси айнан жамғарма маблағлари ҳисобига бунёд этилди. “Хоразм Диёр Макс сервиз” масъулияти чекланган жамиятининг 80 нафардан зиёд ишчиси самарали меҳнат қилишиб, ушбу объектни қисқа фурсатда, яъни олти ой ичида қуриб битказишга эришишди. Қувонарлиси, мажмуа тасарруфида 50х90 метр ҳажмли сунъий қопламали ўйингоҳ ҳам мавжуд. Очиғи, бундай катта ўлчамли сунъий қопламали ўйингоҳ нафақат Янгиариқда, умуман Хоразм воҳасида йўқ эди. Эндиликда, туман марказида катта футбол учрашувларини ўтказиш имкони туғилди.

Спорт мажмуасини очилиш маросимида қатнашган Хоразм вилояти ҳокими Пўлат Бобожонов, Ўзбекистон халқ артисти Санъат Девонов Президентимиз раҳбарлигида диёримизда амалга оширилаётган ислоҳотларнинг аҳамияти ҳақида тўхталишиб, Янгиариқ тумани аҳлини янги спорт кошонаси билан муборакбод этишди.

Тадбирда Ўзбекистон халқ артистлари Гулора Раҳимова, ака-ука Ғофур ва Ғулом Эшжоновлар, шунингдек Янгиариқ тумани маданият ва спорт ишлари бўлимининг бадиий ҳаваскорлари ва ёш истеъдодли хонандалари куйлаган қўшиқлар даврага байрамона кайфият улашди.


Икром ХУДОЙБЕРГАНОВ.