Яҳё Гулмуҳаммади: "Кейинги босқичга чиққанимиздан мамнунман"

Ўйиндан кейинги матбуот анжуманида форслар мураббийи Яҳё Гулмуҳаммади иштирок этди. 

- Кеча бизни қизиқ ва шу билан бирга қийин тўқнашув кутиб турганини айтгандим. Ўйлайманки, бугун тактик курашларга бой футбол гувоҳи бўлдик. Жамоамнинг иштирокидан ва кейинги босқичга чиққанимиздан мамнунман. Ўйиннинг аксар қисмини кўпчилик бўлиб ўтказдик, бу ҳам бизга қўл келди. Шунга қарамай осон ғалабани қўлга киритдик дея олмайман. Майдонда курашган барча футболчиларга раҳмат айтаман. Ушбу ютуқ билан "Персеполис" мухлисларини табриклайман. Бемалол бугунги ютуқ жамоамиз ишқибозлариники дея оламан. 

- "Персеполис" Доҳага келганидан бери тўртта ўйинда гол ўтказмади. Бунинг асосий сири нимада деб биласиз? 

- Бу ҳам ўз навбатида тартибли ўйин намойиш этаётганимизни англатади. Тўртта учрашувда гол ўтказмаганимиз фақат дарвозабон ёки ҳимоячилар туфайли эмас, балки бутун жамоа бўлиб шунга ҳаракат қилаётганимизда. Энг аввало ҳимояда ўйинни тўғри йўлга қўйиб олсак, ҳужумда албатта вазият бўлади. 

- Кейинги босқичдаги рақиб "Ал Насср" ҳақида фикрингиз?

- "Ал Насср" жуда кучли жамоа. Уларнинг ўйинини кўрган борки мақтайди. Чорак финалдан ўтиб олдик ва буёғига навбатдаги беллашув ҳақида бош қотирамиз. Муҳими, иштиёқни охиригача сақлаб қолиш. Ярим финал баҳси янада қийин бўлади. Шунга қарамай бор кучимизни ишга соламиз.