Хўжа кўрди. Боримизни ҳам, аҳволимизни ҳам...

Айтайлик, Болгарияда интернетдан фойдаланиш мутлақо бепул, Бельгияда эса пуллик. Сизнингча, биринчи давлат иккинчисига қараганда ривожланганроқми?

Хулоса учун шошилмаслигингизни сўрайман. Болгария одамларга яхши шароит яратиб қўйган, бунга гап-сўз бўлиши мумкин эмас. Аммо унутмангки, истаса, Бельгиянинг ҳам бунга қудрати етади. Шунчаки Бельгияда одамларнинг фикрлаши янада илгарилаб кетганки, улар текин нарсани ҳазм қила олмайди.

Буларни нега айтмоқдаман, шу йилнинг ўзида дилимни бироз хира қилган 2 та воқеани кўрдим. “Ўзбегим” фестивалидаги ош вақтида ва “Бунёдкор” стадионидаги финал чоғида халқ бир неча сония ичида оламонга айланиши мумкинлигини тушундим. Бир вақтлар ўзимизнинг шайх сўнгги йўлга кузатилаётганда ҳам шу каби ҳунук ҳаракатлар мавзу бўлганди. Энди эса Шайх Салмон кўз ўнгидаги манзарани кўринг.

Одамлар ўзини ундай ёки бундай тутиши керак, деб ақл ўргатмоқчи эмасман, чунки бунга ақлим ҳам етмайди катта эҳтимол билан. Мисол келтириш эса энг чиройли иш. Интенет видеолари орқали кўргандирсиз, қайсидир араб мамлакатидаги гипермаркетда маҳсулотлар 1 соат бепул қилиб қўйилган. Одамларнинг маҳсулотларни тилка-пора қилиши жуда ҳунук манзарани келтириб чиқарганди. Бу кўзи очликнинг классик кўриниши.

Омма онги анча илгарилаб кетган давлатларда ҳам Black Friday ёки шунга ўхшаш акциялар бўлиб туради. Аммо вазият тамомила бошқача. Кимдир дўкондан ўзига керакли нарсани олади, яна кимгадир имкон берилса, эплаганича олиб чиқиш пайига тушади. Бу бир-биридан тамомила фарқ қиладиган жиҳатдир. Ҳар бир инсон ўзига жавоб берса ва ўз принципларида собит турса, оммага эргашиб кетавермайди аслида.

ПФЛ бош директори ОЧЛ финалини Японияда кўриб, анча тўлқинланиб кетган экан. Ўзбекистон Кубоги финалини ҳам яхши савияда ўтказишга ҳаракат қилгани кўринди. Сўнгги вақтларда финаллар қабрга гул қўйгандек аҳамият касб этаётганидан келиб чиқилса, янги раҳбарият анчагина тер тўккани кўринади.

Масаланинг эса бошқа тарафи бор. Биз бир неча бор ўқув юрти талабалари стадионга олиб келинаётганига гувоҳ бўлмоқдамиз. Яъни, хўжа кўрсин учун қиляпмиз бу ишларни. Хўжа кўрди, унга ҳаммаси ёқди, уни алдадик. Аммо келинг, келаси мавсумдан бошлаб ўзимизни алдамайлик. Мен ҳазм қила олмайдиган энг юқори нота шу, ўзимизни алдаш. Бизнинг қон-қонимизга сингиб кетган идеология ҳам шу бўлиб қолаётгани ачинарли. Ёшлар футболида истаганини ёриб ташлаймиз десагу, бунга ёши катта футболчилар билан эришсак, Ўзбекистонга футбол қайтяпти десагу, шундай кўриниши учун мухлисларни ўзимиз кўчириб келсак, ҳамма бирдек жазоланади десагу, кимлардир бундан омонда қолса — буларнинг ҳаммаси ўзимизни алдашдан бошқа нарса эмас.

Ташкилотчилик, ҳаракат ва истак учун раҳбариятга миннатдорчилигимни билдираман. Муҳими, уларнинг ўзида ҳам хоҳиш бор футболни кўтариш учун. Келинг, келаси йилдан бошлаб шуни табиийлаштирайлик. Ўйинларни Шайх Салмон учун маъқул вақтга эмас, одамларга тўғри келадиган вақтга қўяйлик. Бир парча тўп ёки тақир-туқур илинжида келсин майли одамлар стадионга, аммо футбол учун келаётганлари ташқарида ҳам қолиб кетмасин. Текин шўрвага қанчалар мойил эканимизни ўзимиз ҳам билиб бўлдик. Энди ҳаммасини бошидан бошлаб, камчиликларни бартараф этганимиз маъқул. Ахир Япониядаги ОЧЛ финалига ҳам мухлислар ўқув юртларидан олиб келинмаганди-ку, тўғрими?

Гапларим кимгадир теккан бўлса, олдиндан узр сўрайман. Беш қўл баробар бўлмагани каби, юқоридаги ҳолатларни тушунмайдиганлар ҳам, қўллаб-қувватлайдиганлар ҳам орамизда етарлича. Ҳа, футболи ривожланган мамлакатларда ҳам одамлар майдонга ёпирилиб туради. Аммо улар футбол учун, севимли жамоаси учун шу ишни қилади. Биз эса мухлислар “Локомотив” футболчиларини табриклаш учун стадионга югуриб тушди деб, ўзимизни алдаб ўтирибмиз. Тушганларнинг кўпчилиги ўша клубнинг 2 тадан ортиқ футболчисини санаб бера олмаса ҳам керак.

Ва яхши мухлислик учун майдонга тушиш ҳам шарт эмас. “Гремио” мухлисларини кўринг, Эл-Класико ишқибозларини кўринг. Улар мухлисликни ўз нуқтасида ҳам қотирмоқда. Биз эса на унисини ва на бунисини...