Хайрулла Холиқов: "Кечаги Евро-2020 финалида қизиқ эпизод бўлди"
12 июл 2021 11:27
Янгиликлар

Хайрулла Холиқов: "Кечаги Евро-2020 финалида қизиқ эпизод бўлди"

Ҳар бир катта мусобақанинг энг эсда қоладиган эпизоди бўлади. Ва бу эпизодлар асосан финал ўйинида содир бўлади.

Масалан, ЖЧ-98 финалида Фабьен Бартез бразилиялик Роналдонинг устига сакрагани ҳалигача кўпчилигимизнинг хотирасида қолган. Ёки бўлмаса ЖЧ-2006 финалида Зиданнинг калла қўйгани, ЖЧ-2010 финалида Иньеста гол ургач, футболкасини ечиб майдон бўйлаб югургани, Евро-2012 финалидан кейин Балотеллининг кўз ёшлари, Евро-2016 финалида Криштиану Роналдунинг жароҳат олиши ва бош мураббийга ўхшаб майдон четида туриб футболчиларга кўрсатма бериши ва ҳоказо.

Хуллас қайси бир мусобақа финалини эсламанг, нимадир эпизод чиқиб келади. Кечаги Евро-2020 финалида ҳам қизиқ эпизод бўлди. Италия терма жамоаси сардори Кьеллини бир вазиятда ўзидан 18 ёш кичик Сакани футболкасидан тортиб қолди. Агар ўша пайт Сака қочиб кетганида гол уриши ёки голли пас бериши мумкин эди. Менимча, йиллар ўтиб бу мусобақадаги айнан шу вазият анча вақтгача кўз олдимизда муҳрланиб қолади.