Бу ҳақда унинг опаси Катя Авейру Хорватияга қарши плей-офф учрашуви олдидан маълум қилди.
"Бу Криштианунинг терма жамоа сафидаги сўнгги Жаҳон чемпионати бўлади. У мамлакат учун қўлидан келган барча ишни қилди ва биз у билан фахрланамиз", - деди Катя.
41 ёшли Роналду 2003 йилдан буён Португалия миллий жамоаси шарафини ҳимоя қилиб келмоқда. Шу вақт ичида у терма жамоа сафида 220 дан ортиқ ўйин ўтказиб, 140 дан зиёд гол уриб, халқаро футбол тарихидаги энг яхши тўпурарга айланган.
Роналду Португалия билан бирга 2016 йилги Европа чемпионати ва 2019 йилги УЕФА Миллатлар лигасида бош совринни қўлга киритган. ЖЧ–2026 эса унинг фаолиятидаги олтинчи Жаҳон чемпионати ҳисобланади.
Агар бу маълумот тасдиғини топса, Хорватияга қарши баҳс ёки Португалиянинг турнирдаги сўнгги учрашуви Криштиану Роналдунинг миллий терма жамоа либосидаги охирги ўйини сифатида тарихга кириши мумкин.
