Воҳид Холбоев: "Уч футболчимизга Тожикистон жамоаси таклиф билан чиқди"

"Билмадим, тўғрисини айтсам, бугун рақиблардан кучли эдик. Ҳисобда мағлуб бўлдик, аммо "Ифтихор"дан яхшироқ ўйин кўрсата олдик деб ўйлайман. Икки голни ҳам рақибларга совға қилдик. Ўтган ўйинда ғолиб бўлганимиз, 2-поғонадаги жамоадан 4 очкога ўтиб кетганимиз йигитларга қандайдир енгиллик берди, шекилли, шогирдларим бироз бўшашгандек кўринди. Бугун кўплаб вазиятлардан фойдалана олмадик. Бироқ мағлубиятда ҳеч кимни айбламайман. Аммо ҳечқиси йўқ. Биз ҳали ҳам олдиндамиз. Олдиндаги ўйинларда ғолибликка эриша оламиз.

Бугун ўйнадик, энди Тошкентга шошиляпмиз. Чунки эртага "Сўғдиёна" билан ўйнаймиз. Ушбу ўйинга бир неча янги футболчиларни чақирганмиз. Ҳозирча ушбу футболчилар билан ишлар тўлиқлигича битмагани боис, номларни маълум қила олмайман. Эртанги ўйин якунланганидан кейин "Нурафшон" футболчилари 1 ҳафта дам олишади. 11 июль куни "Андижон"га қарши баҳс олиб борамиз. Менимча бу аниқ бўлди.

Ҳа, трансферлар ойнаси очилган. Ҳозирча икки футболчини кўз остимга олиб қўйганман. Бироқ жамоадан кетадиганлар йўқ. Барчанинг ўйинидан қониқиш ҳосил қиляпман. Орипхўжа Абдуҳолиқовга "Машъал", Достонбек Баҳромов, Мурод Ражабов ва Дилшод Файзиевга Тожикистон жамоаси, Фарруҳ Шотурсуновга эса Суперлига клубидан таклиф тушди. Аммо улар жамоани ярим йўлда ташлаб кетгиси келмади ва "Нурафшон"да қолиб, режани охиригача етказишни исташди", - деди Воҳид Холбоев.

Миржалол Норматов суҳбатлашди