Виталий Левченко: "Агарда олиб келишни истаган футболчилар билан келиша олсак, умид қиламанки, келаси мавсумда жамоа кучаяди"

- Бугун йигитларимнинг класси сезилиб турди. Учта гол - мавсумнинг мантиқий якуни. Жамоа олдига қўйилган минимум вазифни бажарганидан хурсандман - улар Суперлигада қолишди ва турнир жадвалида юқорилашга эришишди. Бу ажойиб натижа деб айта олмайман. Шундай бўлса-да, йигитлар курашишди, уларда характер пайдо бўлди. Шу боис уларнинг турнир жадвалида кўтарилишини адолатли деб ҳисоблайман.

- Келаси мавсумда жамоа таркиби қанчалик ўзгариши мумкин?

- Бу футболдаги оддий жараён. Исталган жамоада ўзгаришлар бўлади. Барча жамоа кучайишни истайди. Шу сабабли биз ҳам ишлаймиз, тахлил қиламиз, кузатамиз. Агарда олиб келишни истаган футболчилар билан келиша олсак, умид қиламанки, келаси мавсумда жамоа кучаяди. Жамоанинг асосини сақлаб қолишга ҳаракат қиламиз. Айрим футболчилар атрофида ўйин қуриб, уларга яхши шериклар олиб келиш керак. Шундан кейин жиддий вазифалар учун курашса бўлади. 

- Кеча "Нефтчи"га трансфер тақиқи қўйилиши мумкинлиги борасида хабар чиқди. Бунга қандай муносабатдасиз?

- Бу ечса бўладиган муаммо. Тўғриси, футболчилар билан қанча қарздорлик борлиги ҳақида маълумот билмайман. Клуб исталган молиявий муаммоларни ҳал қилиши мумкин. Шу сабабли янги футболчиларни рўйхатдан ўтказишга умид қиляпман.