Винфрид Шефер: "Калханоглу янги Озил"

Ушбу ёш истеъдод сохиби қисқа муддат ичида футбол жамоатчилигини ўзига қарата олди.
Ямайка терма жамоаси бош мураббийи Винфрид Шефер Калханоглу ҳақида фикр билдираркан, унинг келажаги порлоқ эканини таъкидлаб ўтди.
- Хакан ажойиб ўйинчи. Ундаги ўзига бўлган ишонч ва серғайратлилик менга жуда ёқади. Айниқса, Хакан Калханоглу ижросида жарима тўплари мени ўзига мафтун этган. Ўн тўққиз ёшли йигитчанинг стандартларни бундай ажоиб тарзда амалга ошириши ноодатий ҳодисадир.

Ишонч билан айтишим мумкинки, Калханоглу янги Озилдир. Унга Месут Озил йўлини босиб ўтиши учун яхши бир мураббий керак. Яъни Хакан ўсишдан тўхтаб қолмаслиги лозим. Агар "Гамбург" устози ван Марвейк бу йигитнинг истеъдодини янада ривожлантира олмайдиган бўлса, яхшиси у бирор кучлироқ клуб таркибига ўтиб кетгани маъқул, - деди Шефер.  

Эслатиб ўтишимиз жоиз-ки, Хакан Калханоглу "Гамбург" таркибига ёзда келиб қўшилган эди. Кўрсатаётган ўйини орқали у оз вақт ичида бир неча топ клубларни ўзига қарата олди. Ҳозирда Калханоглуга Европанинг бир қатор етакчи жамоалари қизиқиш билдиришмоқда.