Вадим Абрамов: "Ҳали ойлик олмадик, лекин ҳаракат бор"

- Ўйин ҳақида фикрингиз?

- 18 йилдирки биз мағлуб эта олмаган жамоа билан тўқнаш келиб бугун ҳам юта олмадик. Бугунги баҳсда "Насаф" устидан ғалаба қозонишга жуда яқин келгандик, аммо уч очкони қўлга киритиш яна насиб қилмади. Ўйин охирларида гол ўтказиб юбордик. Умуман олганда ҳимояда ёмон ўйнамадик, фақат охирги лаҳзадаги хато голга олиб келди. Ўйин ҳақида нима дейишим мумкин, менга ўйин ёқмади.

- Қаторасига иккинчи учрашувда 44-рақамдаги футболчини (Кингсли Сарфо) захирага оляпсиз ва шундан сўнг "Динамо" ўйини умуман ўхшамаяпти. Кўп браклар юзага келяпти. Балки машғулотларда нимадир бўлаётгандир. Шу ҳақда нима дея оласиз?

- Шу кунларда қаерда машғулот олиб бораётганимизни биласиз-а. Шундай экан, бу борада бир нарса дейиш қийин.

- Бир нечта сайтлар "Динамо" ойлик маош олмаётгани ҳақида ёзишди. Яқин орада ойлик берилдими?

- Яхшиси бу саволни жамоа раҳбарига бера қолинглар. Фақат шуни айтишим мумкин, ҳали ойлик олмадик, лекин ҳаракат бор. Яқин кунларда ҳаммаси ижобий ҳал бўлишига умид қиламиз.

- Балки ойликлар ўз вақтида берилмаётгани ўйинга таъсир қилаётган бўлиши мумкин-ку.

- Энди ҳар хил гапни айтса бўлади. Дуранг ўйнаб қўйганимиз учун бу ҳам таъсир қилди дейиш мумкин, ютганимизда умуман бошқа гап айтилган бўларди. Ўйлашимча, клуб раҳбарияти ҳаммасини ҳал қилади.

- Биринчи таймда жамоангиз яхши ҳаракат қилди, лекин иккинчи бўлимда тўп назорати ва устунлик рақиб томонга ўтди. Бу нима билан боғлиқ?

- Чунки 1:0 ҳисобида олдинга чиқиб олдик ва хотиржамликка берилдик. Қарши ҳужумларда яхши кўриндик, фақат охирги зарбани йўллайдиган ўйинчи етишмади. Кимдир тўпга югурди, кимдир йўқ. Буларнинг ҳаммаси таъсир қилди. Бу кўпроқ руҳият билан боғлиқ. Мавсум боши бўлгани учунми футболчилар ҳисобни сақлаб қолиш борасида ўйлашяпти. Ким охиригача югураётган бўлса, билингки шижоат борлигидан югуряпти, ақли ва техникаси устунлигидан эмас.

- Ўтган йил иккинчи даврада жамоангиз анча ишончли ҳаракат қилиб, кўп ўйинларда устунлик қилганди. Қишки танаффусда Плетнёв ва Ратиньо жамоани тарк этди. Наҳотки бу икки йўқотиш жамоа ўйинига шунчалик таъсир қилган бўлса?

- Гап шундаки, майдон марказидаги ўйинчиларни йўқотиш ҳар доим жамоага таъсир қилади. Эскиларнинг бир гапи бор: менга ўртадаги ўйинчиларни айт, мен сенга жамоанг қандайлигини айтаман. Буни мен ўйлаб топмаганман. Янгилар ҳозирча бизни қониқтирмаяпти. Қишки йиғинда умуман бошқа футболчилар эди, ҳозир эса умуман бошқа. Баъзан ўзим ўйинчиларни таний олмаяпман. Бу нима боғлиқ билмайман. Мана сиз машғулот ўтказиш учун майдон йўқ деяпсиз, ишонасизми кеча залда шуғулландик. Яна нима дейишим мумкин.

- Бугун битта эксперимент қилиб кўрдингиз, яъни илк бор уругвайлик футболчини майдонга туширдингиз. Шу футболчининг ўрнига андижонлик футболчини ўйнатсангиз ҳам бўларди. У яхшироқ ўйнайди. 19-рақамли футболчи майдонга тушгач, фақат хато қилди, тўпни кўп йўқотди.

- Андижондан чақирган ўйинчимизни ўнг қанот ҳимоясига қўйишимиз керакмиди? Мана бу чинакам эксперимент бўларди. Марказий ҳимоячимиз Дембеле жароҳат олди, кейин Жумабоевни марказга ўтказдик. Кейин уругвайлик футболчини ўнг қанотга қўйдик. Гап шундаки, бу ўйинчи Уругвай терма жамоасида ўйнайди. Бу ҳам нимадандир дарак беради. Балки унда ҳаяжон бўлгандир. Бизда яна аргентиналик футболчи ҳам бор, у ҳам ўз пайтини кутяпти. Яна бир легионеримиз тўпни фақат орқага узатади. У хато қилмаяпти, лекин тўпни нуқул орқага беряпти. Мен ҳам тўпни орқага узата оламан.

- Амонов охирги дақиқаларни ёмон ўтказди.

- У ёмон ўйнамади, фақат тўпни кўп ушлаб турди. Агар у бошқача ҳаракат қилганида бизга гол урилмасди. Умуман олганда Амонов учрашувни яхши ўтказди, кўп марта олдинга борди, балки ўйин охирида толиқиб қолгандир. Биз футбол ўйнаяпмиз, айёрлик қилиб ётиб олаётганимиз йўқ.