Ушбу футболчилар Англияда ҳам ўйнаб кўришлари керак...

Демак, бошқа чемпионатларда тўп тепадиган ва АПЛда ўйнаб кета олиши мумкин бўлган футболчилар ҳақида гаплашамиз!

10. "Реал"нинг истеъдодли футболчиси Иско мадридликлар сафида мунтазам равишда майдонга туша олмаяпти. Футболчига "Арсенал" томонидан қизиқиш борлигини инобатга оладиган бўлсак футболчи "канонирлар" таркибида ўйнаб кета олиши мумкин.

9. Марио Гёце. "Бавария". Германия терма жамоасининг истеъдодли футболчисини ҳам Англия клубларидан бирида кўриш мухлислар учун қизиқ бўлиши аниқ.

8. "Боруссия Д" футболчиси Марко Ройсга ҳам АПЛнинг бир қанча грандлари томонидан қизиқишлар бор. МЮ, "Челси", "Манчестер Сити"лар шулар жумласидандир...

7. Иқтидорли Кевин де Брюне ўз вақтида "Челси" футболчиси ҳисобланарди. Бироқ, у инглиз жамоасидаги вақтини Германия клубларида ижарада ўтказди. "Челси"дан "Вольфсбург" сафига ўтганидан сўнг эса ўзининг ёрқин ўйинларини кўрсатишни бошлади.

6. Айни пайтда дунёнинг энг кучли ҳужумчиларидан бири ҳисобланган Златан Ибрагимович фаолияти давомида ҳеч қачон инглиз жамоаларида ўйнамаган. Унинг ўзи эса яқинда Моуриньо билан бирга ишлаш истаги борлигини айтиб ўтди. Кўрамиз, вазият қай тарзда кўриниш оларкин?

5. Неймар ўзи яқинда "Барселона"га келди дейсизми? У Испанияда намойиш этаётган ўйинини, ажобтовур финтларини Мессисиз ҳам намойиш эта олади. Ишонаверинг!

4. "Реал Сосьедад" таркибидан "Атлетико" сафига бориб қўшилган Антуан Гризманн ҳақиқатдан ҳам кучли футболчи эканлигини мадридликлар сафида ҳам исботламоқда. Унга АПЛда қайси жамоа мос келган бўларди? "Арсенал"ми ёки ҳужумчи борасида муаммоларга дуч келаётган МЮми? Балки у "Ливерпуль"га ўтар...

3. Дунёнинг энг кучли футболчиларидан бири ҳисобланадиган Франк Риберининг Англияда бемалол ўйнаб кета олиши учун барча нарсаси етарли. Техника, тезлик, жисмоний ҳолат!

2. Тўғри, Пол Погба ўз вақтида "Манчестер Юнайтед" аъзоси ҳисобланган. Бироқ, франциялик ёш ярим ҳимоячига ўз вақтида имкон берилмаган. Шундан сўнг у "Ювентус" сафига йўл олган. Агар, у яна "Туманли Альбион"га қайтадиган бўлса қайсидир жамоа аниқ кучаяди!

1. Ва ниҳоят Леооо Месси! Уни Роналду билан таққослашса кўпчилик "Месси АПЛда ўйнаб кета олмайди" мазмунидаги фикрни билдиради. Аммо, шуниси аниқки, аргентиналик футболчи Англия Премьер-Лигасининг чиройига чирой, кўркига кўрк қўшиб бера оладиган футболчидир!

Азиз Тўхтамуродов тайёрлади