Улуғбек Бақоев Тошкент клубларидан бирини бошқарадими? Мураббий иштирокидаги матбуот анжумани

Ушбу учрашувдан сўнг жамоа бош мураббийи Улуғбек Бақоев фикрларини билдириб ўтди. 

Бақоев: - Биринчи бўлимда бироз зерикарли ўйин бўлди. Рақиб бизнинг худудимизда кўпроқ тўпни назорат қилишга ҳаракат қилди. Тезкор гол уриб олганимиз ҳисобига танаффусга яхши кайфиятда йўл олдик. Иккинчи бўлимни учта ўзгариш билан бошладик. Бундан кўзланган мақсад барча футболчиларга имконият беришдир. Бугунги натижани жанговар дуранг десак муболаға бўлмайди.  "Бунёдкор"га кейинги учрашувларда омад тилайман. Худди шу омад бизга ҳам керак.

-"Сўғдиёна" аввалги ўйинларда иккинчи бўлимни сустроқ ўтказаётган эди. Бугун Жасур Ҳасанов ва Шоҳруз Норхоновнинг захирадан майдонга тушиши олдиндан ўйланган тактика эдими?

- Жамоада 20 нафар футболчи бор. Ҳар бир футболчи ўйин амалиётини ҳис қилишини таъминлашимиз лозим. Бу орқали уларни кўриб оламиз. Кубок баҳслари мураббийларга шунинг учун ҳам фойдали. Айрим етакчиларга ҳордиқ чиқариш имконини бердик.

- Сўнгги турда рақиб Биринчи лига вакили "Рубин"нинг даражасидан келиб чиқиб таркибда катта ўзгаришларга қўл урасизми?

- Биз ҳар қандай рақибни ҳурмат қиламиз. У қайси лигада иштирок этиши аҳамиятсиз. Фақат ғалаба учун майдонга тушамиз.

- Фаолиятингизда бурилиш ясаш имкони туғилиб пойтахт клубларидан биридан таклиф тушса қандай қарайсиз?

- Қачонки таклиф бўлса ўйлаб кўришим мумкин. Ҳозирча таклиф бўлмади.

Абдулазиз Искандаров ёзиб олди