Transfermarkt ва Championat.Asia Суперлигада сентябрь ойининг энг яхшиларини аниқлашди

Сўровномада Championat.Asia сайти журналистлари, Transfermarkt порталининг рус бўлими ходимлари иштирок этишди. Эксперт сифатида Ўзбекистон миллий терма жамоаси собиқ ҳимоячиси Бахтиёр Ашурматов таклиф этилди.

Овоз бериш натижаларига кўра, "Динамо" вакили Анвар Ҳожимирзаев энг яхши футболчи деб топилди. У 3 та ўйинда 3 та гол урди. 29 ёшли футболчи фаолиятидаги энг яхши мавсумни ўтказмоқда: у "Динамо" таркибида 19 та ўйинда "гол+пас" тизими бўйича 9+1 балл тўплади. Ҳожимирзаев 32% овоз олди, иккинчи ўринни "Насаф" ярим ҳимоячиси Жавоҳир Сидиқов (26%), учинчи ўринни "Сўғдиёна" вингери Владимир Йовович (21%) эгаллади.

Сентябрь ойида Суперлигада энг яхши мураббий деб Илёс Зейтуллаев тан олинди. Унинг қўл остида "Бунёдкор" иккита ўйинда ғалаба қозонди ("Динамо" 3:2 ва "Сурхон" 1:0), бундан ташқари чемпионат пешқадами "Насаф" билан дуранг ўйнади (2:2). Зейтуллаев 42% овоз тўплади ва "Насаф" устози Рўзиқул Бердиевни (36%) ортда қолдирди.