Тошкентга Мхитарян бошчилигидаги Арманистон терма жамоаси келади
30 дек 2019 11:01
Янгиликлар

Тошкентга Мхитарян бошчилигидаги Арманистон терма жамоаси келади

Бироз олдин Ўзбекистон ва Қозоғистон ўртасидаги ўртоқлик учрашуви бекор қилингани ҳақида хабар бергандик.

ЎФА халқаро бўлими саъй ҳаракатлари туфайли тезда Қозоғистон ўрнига бошқа рақиб топилди. Бу Генрих Мхитарян бошчилигидаги Арманистон терма жамоаси. ЎФА ҳамда АФА ўртасидаги келишувга кўра мазкур баҳсда иккала жамоа ҳам энг кучли таркиби билан ўйнайди. Демак, 26 март куни Тошкентга "Рома"да ўйнаётган Генрих Мхитарян, "Хоффенхайм"да голлар ураётган Саргис Адамян ва бошқа футболчилар ташриф буюришади.

Маълумот учун, Ўзбекистон терма жамоаси шу кунга қадар Арманистон билан иккита ўртоқлик учрашуви ўтказган ва иккаласида мағлуб бўлган. Арманистон терма жамоаси ҳеч қачон Ўзбекистонга келмаган.

2001 йил февраль ойида Болгарияда ўтган баҳсда Арманистон 2:0 ҳисобида ғалабага эришган. 2010 йил май ойида Еревандаги учрашувда мезбонлар 3:1 ҳисобида зафар қучишган. Биздан Александр Гейнрих ягона голни урган эди.