"Биз уни топдик". Терма жамоа ҳақидаги мақолага қўшимча

Тонгда Championat.asia'да "Икки қайиқнинг бошини тутган чўкиб кетади" мавзусида мақола эълон қилинди. 

Шахсан ўзимга Абрамовнинг футболи ёқади, ҳақиқатан ҳам чиройли. Ўйлашимча, ўртоқлик ўйинидаги натижа унчалик муҳим эмас, ғалаба талаб қилмаслик керак. Шунинг учун ўйин ёки натижага тўхталмадим. Эътиборимни бошқа жиҳат тортди. 2018 йилги мундиал саралашида айнан шу муаммо бизга панд бериб қўйгани учун ҳам ёздим.

"Тезкор студия" дастурининг 5 ноябрдаги сонида Шаҳбоз Беғамов "Бунёдкор"да энг яхши таассурот қолдираётган Нурилло Тўхтасиновнинг терма жамоага чақирилмаганини қоралади. 13 ноябрь куни эса Толибжон Қосимов Ҳусниддин Алиқулов миллий жамоа либосида синовдан ўтказилиши мантиқий қарор бўлишини айтди. Ҳар икки фикрда жон бор, аммо Ироқ термасига қарши ўйинда "Насаф" ҳимоячисига 1 дақиқа ҳам ўйин амалиёти берилмади — Қобилов яна тўлиқ ўйнади. Айнан шу қарорни нотўғри ҳисоблаганим учун тонгги мақолани ёзишга қарор қилдим.

Материал шундай сўзлар билан якунланган эди:  "Санжар Қодирқулов ҳамда Исломжон Қобилов "SOCCER CAREER AGENCY" хизматидан фойдаланади (бу агентликнинг таъсисчилари ҳақида ҳеч қандай маълумот тополмадик). Ҳар 2 футболчининг "Бунёдкор" билан амалдаги шартномаси жорий йилнинг 31 декабрида якунига етади ва уларнинг легионерга айланиш эҳтимоли йўқ эмас. Бу билан ҳеч нарсага шама қилмоқчи эмасмиз, шунчаки, факт ўрнида қабул қиласиз".

Шундан кейин "SOCCER CAREER AGENCY" ҳақида маълумот йиғишга ҳаракат қилиб кўрдик ва уддаладик. Бизга маълум бўлишича, ушбу агентлик россиялик Юрий Белоусга тегишли экан. Маълумот учун, "Бунёдкор"нинг собиқ ярим ҳимоячиси Жасур Жалолиддиновнинг "Локомотив" (Москва)га ўтишини айнан шу киши ташкиллаштирган.

Айтишларича, Вадим Абрамов ва Юрий Белоус ўртасидаги муносабатлар анчагина илиқ экан. Ўйлаймизки, ҳеч қандай дўстлик ёки муҳаббат мамлакатимизнинг бош жамоаси манфаатларига соя сололмайди... 

Фахриддин Рўзиев, ЎзЖОКУ талабаси