Суперлига. Бугун 9-турнинг охирги учта ўйини ўтказилади

АГМК — СЎҒДИЁНА
Мусобақа жадвалида ёнма-ён кетаётган жамоалар ўртасидаги баҳс. Миржалол Қосимов ўзининг собиқ шогирди Улуғбек Бақоевга қарши.

Жиззах клуби бу мавсум сафардаги 3та ўйиннинг барчасида мағлуб бўлди. Бу йилги чемпионатда умуман дуранг ўйнамаган ягона клуб - "Сўғдиёна".

Бу клублар Ўзбекистон чемпионатида 20 марта ўзаро ўйин ўтказишган. Кичик устунлик олмалиқликлар томонида - 8 ғалаба ва 7 мағлубият. Қолган бешта ўйинда эса томонлар дуранг ўйнашган.

АГМК ўз майдонида ушбу клубга фақат бир марта мағлуб бўлган (2016 йил).

НАВБАҲОР — МЕТАЛЛУРГ
Ўтган тур чемпионат етакчилари билан дуранг ўйнаган клублар ўртасидаги баҳс. "Металлург" сафарда 4та ўйин ўтказиб умуман ғалабага эриша олмади (1 дуранг ва 3 мағлубият).

Бу клублар Ўзбекистон чемпионатида шу кунга қадар 44та ўйин ўтказишган. 20 марта "лочинлар" 3 очкога эга чиқишган. 12та ўйинда "Металлург" ғолиб бўлган ва 12та учрашувда дуранг кузатилган.

"Навбаҳор" майдонида ўтган 22та учрашувнинг фақат биттасида "Металлург" ғолиб бўлган (2016 йил).

Бу мавсум "Навбаҳор"нинг мағлубиятсиз серияси 5та ўйинга етди. "Металлург" эса икки турдан буён ғалаба қозона олмаяпти.

БУХОРО — ДИНАМО
Ўзбекистон терма жамоаси собиқ ҳимоячилари Бахтиёр Ашурматов ва Даврон Файзиев ўртасидаги тўқнашув.

"Динамо" сўнгги учта турда мағлуб бўлгани йўқ (1 ғалаба, 2 дуранг). "Бухоро" эса аксинча 4та ўйиндан буён ғалаба қозона олмаяпти.

"Бухоро" ва "Динамо" шу кунга қадар 44 марта ўзаро ўйин ўтказишган. Шундан 20тасида "Бухоро" ғолиб бўлган, 16 марта Самарқанд клуби 3 очкони қўлга киритган. Қолган 8та учрашувда муроса кўчаси танланган.

Ўзаро ўйинларнинг сўнгги 8тасида "Бухоро" бу рақибни мағлуб эта олмаган. Сўнгги бор бухороликлар 2013 йилги мавсумда "Динамо"ни таслим қилишганди.