“Севинч” янги мавсум тайёргарлигини давом эттирмоқда ФОТО

Машғулотлар кунига икки маҳалдан, универсал манежда бўлиб ўтмоқда.

Афсуски, ҳар йили Тошкентда ўтказиладиган мини футбол бўйича Ўзбекистон чемпионати ва Ўзбекистон Кубоги мусобақалари бу йил ўтказилмади. Бу чемпионат бу йил умуман ўтказиладими ёки йўқми, ҳозиргача номаълумлигича қолмоқда.

Шу боис, клуб мураббийлари жамоанинг тайёргарлик режасига ўзгартириш киритишга мажбур бўлишаяпти. Чунки, ҳар йили жамоа янги футбол мавсумини мини футболдаги иштироки билан бошлаган.

Шу сабаб, “Севинч” феврал ойида Тошкентга сафар уюштиради. У ерда ўқув-йиғин машғулотлари ташкил этилади. Йиғин давомида мураббийлар катта футбол бўйича бир қанча назорат учрашувларини ҳам ўтказишни мўлжаллашмоқда. Жумладан, назорат учрашувлари “Бунёдкор W”, “Металлург W” ва “Олмалиқ W” жамоалари билан бўлади.

Клуб раҳбарияти томонидан 28 нафар футболчи билан шартномалар имзоланди. Жамоага янги келган футболчилар ҳам бор, бунгача “Бунёдкор W” жамоасида тўп тепган ярим ҳимоячи Дарина Федосенко ва муқаддам  “Олмалиқ W” жамоасида фаолият юритган ҳимоячи Лайло Шодиевалар бу йилдан жамоа таркибига қўшиб олинди. Шунингдек жамоа таркибига, ўтган йили қуйи лигада ўйнаган бир қатор ёш футболчилар ҳам асосий таркибга ўтказилди.

Жамоа селекция ишлари давом этттирил моқда, яна таркибига янги футболчилар келиши мумкин.

Қуйида бугунги машғулотлардан олинган фотосуратларни томоша қилинг.