Сервер Жепаров: "Ўтган сафар мундиалга йўлланма олишга жуда яқин келгандик"

"Гуруҳда биринчи ўринни эгаллаганимиздан хурсандмиз. Қилган меҳнатларимиз зое кетмади. Баҳрайнга қарши ўйинда ҳам ғалаба лойиқ эдик деб ўйлайман. Гарчи учрашув биз учун қийин кечган бўлсада, ғалабани ўз томонимизга оғдира олдик. Ушбу босқичдаги олдимизга қўйилган вазифани уддаладик ва табиийки жамоанинг кайфияти юқори даражада. Ўз уйимиздаги ўйинларда ёрқин футбол кўрсата олмаяпмиз? Менимча, бу рақиб жамоаларининг ҳимоядан ўйнаётганидан бўлса керак. Шу боисдан ҳам биз уларни ҳимоя қўрғонини ёриб ўтишда кўпроқ муаммоларга дуч келдик. Ҳар бир жамоа ўз майдонида ғалабани кўзлайди ва асосий эътиборини ҳужумга қаратади. Шу туфайли сафардаги учрашувларда эркинроқ ва самарали ўйнаймиз. Мундиал чиптаси? Нега энди йўқ? Албатта ЖЧга йўлланма олиш учун бор кучимизни сарф этамиз. Ўтган сафарги уринишда бунга жуда яқин келгандик. Бизга ўшанда фақатгина омад етишмаганди. Бу сафар олдимизда турган вазифани уддалаймиз деб ўйлайман. Орзуимизга етишиш учун қаттиқ курашамиз", - деди Сервер Жепаров.