Сергей Арсланов: "Шамол мезбонлар дарвозаси томон эсаётганди, бундан фойдаланишга уриндик"

Сергей Арсланов: "Дуранг - иккала жамоа учун адолатли натижа. Афсуски, урган голимиз ҳисобга олинмади. Тўқнашувлар, иккинчи қаватдаги курашлар кўп бўлди. Бу ҳар бир жамоа 3 очко учун курашганини англатади. Ишлашда давом этамиз.

- Иккинчи бўлимда узоқ масофадан зарбалар бериш ҳақида кўрсатма берганмидингиз?

- Ҳа, биз рақибдан келиб чиқиб ўйнадик. "Қизилқум" чуқур ҳимояга ётганини ҳисобга олиб, узоқ масофадан зарбалар бердик. Шамол ҳам мезбонлар дарвозаси томон эсаётганди, бундан фойдаланишга уриндик. Бу ўз натижасини берди, чунки хавфли вазиятлар содир бўлди.

- На "Сурхон" ва на "Қизилқум" сифатли ўйин кўрсата олмади, балки об-ҳаво ҳалал бергандир?

- Тўғри, фикрингизга қўшиламан, аммо об-ҳаво яхши эди. Футболдан кўра курашлар кўп бўлди. Асосан иккинчи қаватда.

- "Сурхон" жамоасининг Суперлигадаги мақсади нима? Мавсум кутганингиздек ўтяптими?

- Мавсумдаги натижалардан ҳайрон бўлганим йўқ, жамоамиз яхши ўйин кўрсатяпти. Биз кутилганидан юқоридагилимиз меҳнатимиз самараси. Олдимизга юқори мақсадларни қўйганмиз. Эришилган натижа билан тўхтаб қолмоқчи эмасмиз.

- Чориев нега майдонга тушмаяпти?

- Ёшларнинг ўйини барқарор бўлмайди, ҳозир эса унда бироз пасайиш бор. Шу сабабли уни асосий таркибга киритиш қийин. Йигитча маҳаллий футболчилардан, қанча кўп шундай ёшлар ўсса, мамлакатимиз футболига шунча фойда. Ҳаммаси унинг қўлида. Ҳаммага имконият беришга тайёрмиз.

- "Сурхон" меҳмондаги ўйинларга 3-4 кун олдин келмоқда. Бу маҳаллий об-ҳавога кўникиш учунми?

- Сабаблари кўп. "Насаф" билан ўйиндан сўнг тикланиш уйга қайтиб, Навоийга келиш учун кўп вақт кетар эди. Кўникиш учун ҳам вақт керак бўлди.