“Саутгемптон” Чемпионшип плей-офф босқичи финал учрашувидан четлаштирилди, дея хабар бермоқда Sky News журналисти Роб Харрис.
Бундан олдинроқ, “Саутгемптон” таҳлилчиси плей-оффнинг илк учрашуви олдидан “Мидлсбро” жамоасининг машғулотларини видеога олаётган ва тактикасини суратга тушираётган пайтда қўлга тушгани маълум бўлган эди. Инглиз футбол лигаси (EFL) ушбу ҳолат бўйича суриштирув ишларини бошлаган эди.
Икки ўйин натижасига кўра “Саутгемптон” “Мидлсбро”дан устун келиб (0:0, 2:1), финалга йўл олганди. Жамоа 23 май куни АПЛ йўлланмаси учун “Халл Сити”га қарши майдонга тушиши керак эди.
Эндиликда “Саутгемптон” нафақат финалдан четлатилди, балки Чемпионшипнинг кейинги мавсуми учун 4 очколик жаримага ҳам тортилди.
Ушбу жазо фақатгина плей-офф ярим финалидан олдин “Мидлсбро” машғулотларини яширинча кузатгани учун эмас, балки чемпионат доирасида декабрь ойида “Оксфорд” ҳамда апрель ойида “Ипсвич”га қарши баҳслар олдидан амалга оширилган жосусликлар учун ҳам қўлланилган.
Қайд этилишича, “Саутгемптон” Премьер-лигага қайтган тақдирда ишлаб топиши мумкин бўлган камида 200 миллион фунт стерлинг даромаддан маҳрум бўлди.
