"Саутгемптон" Англия футбол лигасининг (EFL) жамоани Чемпионшип плей-офф финалидан четлатиш ҳақидаги қарори устидан аппеляция бериш ниятида.
Эслатиб ўтамиз, аввалроқ "Саутгемптон" таҳлилчиси плей-офф босқичидаги илк учрашув олдидан "Мидлсбро" жамоасининг машғулотини видеога олаётган ва тактик чизмаларини суратга тушираётган вақтда қўлга тушган эди. Икки ўйин натижасига кўра, "Саутгемптон" рақибини мағлуб этиб (0:0, 2:1), финал йўлланмасини қўлга киритганди. Режага кўра, жамоа 23 май куни АПЛ йўлланмаси учун "Халл Сити"га қарши майдонга тушиши керак эди, бироқ энди финалда "Мидлсбро" ўйнайдиган бўлди. Шунингдек, ушбу ва бундан олдинги яна иккита шпионлик ҳолати учун "авлиёлар"дан кейинги мавсумда 4 очко олиб ташланди.
Инсайдер Бен Жейкобснинг хабар беришича, "Саутгемптон" тез орада расман аппеляция топширади. Клуб раҳбарияти бу жазони ўта адолатсиз деб ҳисобламоқда ва барча ҳуқуқий имкониятларни ишга солишни режалаштирган.
Ҳозирча Гэмпшир графлиги клуби ушбу вазият бўйича бирон бир расмий баёнот бергани йўқ.
