Самарқанд ва Шипилов учун "қора" кунлар давом этади. "Пахтакор" - "Динамо" учрашувидан 8та факт

Қизиқарли ва голларга бой ўтган ўйинда мезбонлар 3:2 ҳисобида ғалаба қозонди.  Мазкур учрашувдан сўнг бир қатор қизиқарли фактларга тўхталиб ўтсак. 

1. Ушбу беллашув жамоалар тарихидаги 50 ўйин сифатида тарихга кирди.

2. Андрей Шипилов мураббийлик фаолиятида тўққизинчи бор "Пахтакор"га қарши майдонга чиқди ва уларнинг барчасида мағлубиятга учради. 

3. Кеча майдон эгалари таркибида Пшемислав Банашак, Илья Мартинович дебютини ўтказди. Полшалик ҳужумчи жамоадаги илк баҳсида гол урди. Меҳмонларда эса Марат Бикмаев, Элгужа Григалашвили, Шоҳруҳ Маҳмудхожиев дебютини нишонлади.

4. Драган Черан бу йил ҳисобидан Суперлигадаги 6 голини урди. У гол урган учрашувларда  "Пахтакор" мағлубиятга учрагани йўқ.

5. Марат Бикмаев жорий мавсумдаги биринчи тўпини "Пахтакор" дарвозасига киритди. Ҳужумчи жамоасининг иккинчи голига ҳам муаллифлик қилди.

6. "Шерлар" ушбу мавсумда биринчи маротаба битта ўйинда 3та гол уришга муваффақ бўлди. 

7. "Пахтакор" самарқандликлар билан ўзаро ўйинлардаги 103 голини урди, 39 ғалабасини тантана қилди.

8. "Динамо"нинг Суперлигадаги ғалабасиз серияси 8та учрашувга етди. Жамоа сўннги бор 5-турда  "Локомотив"дан устун келганди.

Абдулазиз Искандаров