Салим Мустафоев миллий терма жамоа йиғинига жалб этилди

Режага кўра, терма жамоа аъзолари 14 августгача Тошкентдаги «ЖАР» стадионида машғулот ўтказади. Ушбу йиғин давомида миллий терма жамоа ўртоқлик-назорат учрашувини ўтказиши режалаштирилган. Миллий терма жамоа бош мураббийи Миржалол Қосимов мазкур йиғинга жами 26 нафар футболчини таклиф этган.

Маълумот ўрнида, Қосимов дастлаб эълон қилган 26 нафар футболчи рўйхатидан жой олган Тошкентнинг «Пахтакор» клуби ҳимоячиси Максимилиан Фомин жароҳати сабаб терма жамоа йиғинини ўтказиб юборадиган бўлди. Терма жамоа мураббийлар штаби, Фомин ўрнига Тошкентнинг «Локомотив» клуби ҳимоячиси Салим Мустафоевни йиғинга жалб этган.

Эслатиб ўтамиз, Ўзбекистон миллий терма жамоаси 6 ҳамда 10 сентябрь кунлари ЖЧ-2014 саралаши плей-офф босқичида Иордания терма жамоасига қарши баҳс олиб боради. Терма жамоалар ўртасидаги дастлабки ўйин 6 сентябрь куни Иордания пойтахти Амман шаҳрида ўтказилса, жавоб учрашувига 10 сентябрь куни Тошкент мезбонлик қилади.