Рўзиқул Бердиев: "Бизга бугун уч очко жуда зарур эди"

- Ўйин ҳақида фикрингиз?

- Ўйинда балки сифат ва мазмун бўлмагандир, лекин ғалаба учун кураш ва хоҳиш борлиги ҳар икки жамоада кўринди. Майдон ҳолати жуда оғир экан, бу ўйинга катта таъсир кўрсатди. Балки майдонга масъул кишилар буни тўғрилашар.

Кеча ўйинолди машғулотдан сўнг футболчиларга оддий ўйнаб бўлса ҳам натижа қилишимиз керак деб уқтиргандик. Биз бугун оддий ўйнадик, асосан узун тўп узатишлар билан машғул бўлдик. Лекин муҳими ғалаба қозондик. Бизга бугун уч очко жуда зарур эди. Ушбу ғалаба билан жамоамиз аъзоларини ва узоқ йўл босиб келган мухлисларимизни табриклайман.

- Мазмунсиз ўйин намойиш этилди деб айтиб ўтдингиз. Бу "Ал Аҳли"га қарши баҳсда кўп куч йўқотилгани билан боғлиқми?

- Нафақат биз, балки "Қизилқум" ҳам сифатсиз ўйин намойиш этди. Бундай майдонда ҳар икки жамоа қийналди. "Ал Аҳли"га қарши сафарда тўп тепганимиз боис тикланиб олиш жуда муҳим эди. Шунинг учун фақат натижани ўйлаб ҳаракат қилдик. Бир сўз билан айтганда, натижа учун ўз ўйин услубимиздан воз кечдик.