Равшан Эрматов: "Сречко Катанец "Пахтакор" - "Сурхон" ўйинидан 3 нафар ёш футболчини ён дафтарига ёзиб олди"

Ушбу учрашув якунлангач жамоа аъзоларига расман чемпионлик кубоги топширилди. Тақдирлаш маросимида кўплаб мартабали меҳмонлар, мутасадди раҳбарлар иштирок этишди. Улар қаторидан ўрин олган ЎФА биринчи вице-президенти Равшан Эрматов фикрлари билан ўртоқлашди. 

"Аввало "Пахтакор" мухлисларини навбатдаги чемпионлик билан табриклаймиз. Жамоа мураббийлари, футболчилари бу йўлда катта меҳнат қилишди. Албатта буни ҳам эътироф этишимиз керак. Мавсумнинг якуни бўлгани боис айрим футболчиларда чарчоқ аломати борлиги кўриниб турибди. Шундай бўлсада, миллий терма жамоамиз бош мураббийи Сречко Катанец 3та ёш футболчини ўзининг ён дафтарига ёзиб олди. Қувонтирадиган жиҳати шуки, бизда янги ёш футболчилар етишиб чиқмоқда. Улар эртанги кунда терма жамоамизнинг асоси бўла олади",- дейди Равшан Эрматов. 

- Сир бўлмаса, 3 нафар футболчининг исмини айта оласизми?

- Мен бу жараёнга аралашмайман. Чунки бу нотўғри бўлади. Терма жамоа мураббийи хурсанд бўлиб 3 нафар футболчининг ўйинини кузатиб боришини айтди. Бундан мен ҳам хурсандман. Мана шундай ўйинлар орқали ёшлар шаклланади, ўсади. Ўзларининг орзуси бўлган терма жамоада ўйнаш учун астойдил ҳаракат қилишади.