Пике: “Барса”га қайтаман. Шу ерда туғилдим, шу ерда ўламан”

“Аввало, ташаккур. Барча жамоадошларим, ходимлар, спорт залида меҳнат қилаётганларга … Бизга ҳар куни ёрдам берадиганлар, ҳаётимизни осонлаштира оладиган ҳар бир ходимга. Ўтган давр учун раҳбариятга раҳмат.

Ҳаётда ёш улғайган сайин, баъзида севиш – қўйиб юборишни англатишини тушунасиз. Муносабатларимизда шунча муҳаббат ва эҳтирослар бор эди. Фикримча, бизга бироз дам бериш вақти келди.

Келажакда яна шу ерда бўлишимга ишончим комил. Бу хайрлашув эмас, кўп йиллар олдин ҳам кетгандим ва кейин қайтиб келганман. Шу ерда туғилдим, шу ерда ўламан. Яшасин, “Барса”!”, деган Пике.

Эслатиб ўтамиз, 35 ёшли испан 1997-2004 йилларда каталонияликлар академиясида тарбияланган. 2004-2008 йиллар давомида “Манчестер Юнайтед” аъзоси бўлган ва 2006/07 йилги мавсум ижара асосида “Сарагоса”да ҳаракат қилган. “Барса”га эса у 2008 йил қайтди ва ҳозиргача фаолият олиб бораётганди.