ПФЛ "Олимпик"ка 5 январгача муҳлат берди, акс ҳолда...

Суперлига ўтиш ўйинларида мағлуб бўлган "Олимпик" футбол клуби "Суперлига ва Пролига регламенти"нинг 10.3-бандидан келиб чиқиб, "Металлург" ўрнини эгаллаш учун биринчи рақамли номзод ҳисобланади. Бироқ клуб регламентнинг 11.1-бандига кўра янги мавсум учун йиллик харажатлар сметаси лойиҳасини шу клубни молиялаштирувчи ташкилот ҳамда ЎФА билан келишган ҳолда тасдиқлашга улгурмаган.

"Металлург" янги мавсумни Суперлигада ўтказмайди

Шундан келиб чиқиб, Лига "Олимпик" футбол клубига ўзининг келгуси режаларига ойдинлик киритиш учун 2025 йилнинг 5 январь санасига қадар вақт тақдим этиб, расмий хат йўллади. Унинг нусхалари Миллий олимпия қўмитаси ҳамда Ассоциацияга юборилди. Агар "Олимпик" 2024 йилда бўлгани каби Суперлигада иштирок этишга қарор қилса ва лицензиялаш талаблари асосида фаолият олиб боришга кафолат берса, элитанинг сўнгги иштирокчиси номига ойдинлик киритилган ҳисобланади. "Олимпик" клуби келгуси мавсумни Пролигада ўтказишни афзал билса, Лига мусобақа регламентидан келиб чиқиб, "Хоразм" футбол клуби режаларини ўрганишни бошлайди.