"Пахтакор" билан ўйиндан кейин "Навбаҳор" шикоят ёзди

Шикоятда айнан қайси эпизодларга нисбатан эътироз борлиги аниқ кўрсатилган. Мазкур шикоят кўриб чиқилиши юзасидан клуб иш олиб боряпти.

Иш 48 соат ичида амалга оширилиши керак. Амалга ошиши билан ЎзПФЛ шикоятни ЎФА Ҳакамлик-инспекторлик қўмитасига оширади. Қўмита регламент бўйича бир ҳафта муддат ичида бу ишни кўриб, ўз хулосасини тақдим этади (одатда тезроқ кўриб чиқилади).

Шунингдек, кечаги учрашувда рақиб жамоа обрўсини ерга уриш, рақиб жамоани ҳақорат қилиш ҳолати ҳам қайд этилган. ЎФА тегишли қўмитаси мухлислар хулқи юзасидан ҳам қарор қабул қилиши мумкин.

Маълумот учун, ЎзПФЛ мусобақа ўтказадиган ташкилот сифатида юқоридаги нормалар юзасидан воситачилик қилади. Бироқ қарорлар бевосита ЎзПФЛ томонидан қабул қилинмайди, ташкилотда бундай ҳуқуқнинг ўзи йўқ, - деб ёзади Диёр Имомхўжаев телеграмдаги ўз саҳифасида. 

Эслатиб ўтамиз, "Пахтакор" - "Навбаҳор" учрашувида 2:1 ҳисоби қайд этилди. Бош ҳакам Илгиз Танташев иккала жамоа аъзоларига биттадан қизил карточка кўрсатди.