"Пахтакор-79"ни хотирлаб - Равиль Агишев

Равиль 1959 йил Бухорода таваллуд топган. Болалигиданоқ футбол билан ошно тутинган Агишев футболчилик фаолиятини мураббий А.Чернишев бошчилик қилган Бухоронинг “Спартак” жамоасида бошлаган. Болалар тоифасида турли мусобақаларда муваффақиятли иштирок этган. Кейинроқ 1973 йилдан Тошкентда янги мураббийлар Гурас Дараселия ва В.Бабич қўл остида шуғулланиб, 1975-76 йилларда Герман Титов номидаги спорт-интернатда ўқиш чоғида ихтисослаштирилган футбол мактаблари турнири финал баҳсларида қатнашган. 1975-76 йилларда "Пахтакор" иккинчи таркибида, 1977 йил Хоразмнинг "Хонқа" жамоаси сафида ўйнаган. Ушбу жамоа сафида Равиль Агишев Ўзбекистон Кубоги соҳиби ва спорт устаси номзодлигига эга бўлди. 1978 йил эса уни мамлакатнинг бош жамоаси саналган "Пахтакор"га таклиф этишади. Ўша йили Агишев 13 учрашувда майдонга тушиб, марказий ҳимоядаги ишончли ўйинлари билан мухлислар меҳрини қозонди. Ҳалокат рўй берган 1979 йил эса 14 беллашувда майдонга тушиб улгурганди. Ягона голини Ростовда СКА жамоаси дарвозасига урган.

Ўша йили ёзда Агишев Ўзбекистон терма жамоаси таркибида Олег Базилевич қўл остида Иттифоқ cпартакиадасида иштирок этди. Олим Аширов билан биргаликда улар марказий ҳимояда жуда ишончли ўйин кўрсатишди. 8 августда Тошкентда "Заря"га қарши кечган беллашувда Равиль умуртқасидан жароҳат олади. Аслида бундай жароҳат билан ўйинни ўтказиб юбориш мумкин эди. Бироқ жамоа дуч келган жароҳатлар эпидемияси сабабли Агишев сафарга йўл олади ва жамоага ёрдам беришни истайди. Афсуски, 20 ёшида ҳали уйланмаган Равиль ҳаёт билан видолашди.

Равиль Агишев ва Владимир Собировнинг биринчи мураббийлари бўлган Анатолий Червов кейинчалик ўз ишини якунлашни лозим топган. Унинг икки шогирди ўша машъум ҳалокатда ҳаёт билан видолашган.

Равиль Агишев ишқибозлар ёдида ҳамиша курашувчан, ёш ва ишончли ўйин намойиш қилган ҳимоячи сифатида қолади.