ЎзПФЛ. Бухоро ва Ғузордаги стадионда муаммолар мавжуд

Қаршидаги Марказий стадион майдонини янгилаш ишлари эса якунига етиб улгурмади. Шундан келиб чиқиб, "Насаф" ва "Машъал" клублари мавсумни Ғузорда бошлади. Бироқ Суперлига 2-туридан ўрин олган "Машъал" — "Локомотив" ўйинидан кейин "Шўртан" клубига қарашли стадион майдони шикастланди. Айни дамда унда сифатли футбол ташкил этиш имконияти вақтинча мавжуд эмас. 

Қайд этиш керак, Ғузордаги стадионда дренаж билан боғлиқ муаммо мавжуд эканлиги 2025-йилги мавсум аввалида маълум эди. Шундан келиб чиқиб, ўтган мавсум Шўртан мавсумни ўз майдонида бошлай олмади. Бироқ кейинчалик Лига ва клуб ўзаро келишув асосида Ғузордаги стадионни шартли равишда ишга туширди. Бунда ҳудуддаги ичимлик суви билан боғлиқ муаммодан келиб чиққан ҳолда майсани парвариш қилиш имконини бериши мумкин бўлган бошқа усуллар синовдан ўтказилди. Бироқ 5 март санасидаги кучли ёмғир дренаж билан боғлиқ муаммони қайта очиб берди. 

Ғузордаги стадионда ажриқ нави нисбатан кўпроқни ташкил этишидан келиб чиқиб, стадионни 20 март санасидаги беллашувга қадар тайёрлашнинг назарий имконияти мавжуд. Ҳар эҳтимолга қарши Лига "Насаф" клубига "Сурхон" билан беллашув учун бошқа ареналар билан музокара ўтказиш зарурлигини тушунтирди. 

Маълумот учун, март ойининг дастлабки кунларида бутун Ўзбекистон бўйлаб кучли ёмғирлар кузатилди. Бироқ Лига томонидан майдоннинг дренаж тизимига қўйилган талаблар бажарилган стадионларда ҳеч қандай муаммо кўзга ташланмади. Айни вақтда Насаф клуби Марказий стадионни тезроқ қайта ишга тушириш масаласида иш олиб бормоқда. Дастлабки режага кўра, клуб жорий йилнинг апрель ойидан эътиборан ўз уйига қайтиши керак эди. 

Аввалроқ "Машъал" "Қизилқум" клуби билан ўзаро келишган ҳолда давралар давомидаги икки учрашув локациясини ўзаро алмаштиришни сўраб мурожаат қилди. Бироқ Лига мазкур таклифни рад этди. Зеро бирор клубга бу борада енгиллик тақдим этилса, мавсумни ўз майдонида бошлай олмаётган қолган клублар ҳам тақвимни ўзгартириш юзасидан ўз таклифини билдиради. Бунинг оқибатида Регламент бўйича талаблар ижроси масаласига путур етиши мумкин.   

Бухородаги стадионда ҳам муаммо мавжуд

Аввалроқ Суперлига 1-туридан ўрин олган "Бухоро" — "Қўқон-1912" учрашувидан сўнг Лига Бухоро футбол клубини ҳам расман огоҳлантирганди. 

Суперлига регламентининг 4.5-бандига кўра, Суперлига стадиони учрашувдан бир соат олдин Ҳакам ва Комиссар томонидан баҳоланади. Умумий баҳо 4 дан паст бўлса, клуб расман огоҳлантирилади. Бу каби ҳолат кетма-кет иккинчи бор кузатилса, клубга нисбатан жарима интизом чораси қўлланилади. Учинчи шундай ҳолатдан кейин стадион Суперлига рўйхатидан чиқарилади. 

Мусобақанинг 1-турида Бухоро футбол академияси майдони 4 баҳодан пастроққа лойиқ кўрилган. Айни вақтда вилоятдаги ягона сифатли стадионни парвариш қилиш учун мўлжалланган техника мавжуд эмас. Лига ўтган мавсум сўнгидан бошлаб бу масалани бир неча бор кўтарганига қарамай, вилоятда муаммо ижобий ҳал этилганича йўқ. Шундан келиб чиқиб, Регламент бўйича муаммолар кетма-кетликда кузатилишда давом этса, Лига вилоятда Суперлига ўйинлари давом этишини кафолатламайди. Бу ҳақда клуб, вилоят ҳокимлиги ҳамда вилоят футбол ассоциацияси Суперлига 1-туридан кейин расман огоҳлантирилган.