Олий лига. 17-тур рамзий терма жамоаси

"Металлург"ни Бекободда мағлуб этиш унча мунча жамоанинг қўлидан келавермайди. "Машъал" камчиликда бўлса ҳам буни амалга ошира олди. Жамоа посбони Жавоҳир Илёсов мезбонларнинг бир нечта зарбаларини қайтаришга эришди. Ҳимоячи Искандар Шойқулов эса ҳужумларни қайтаришда фаоллик кўрсата олди.

"Бухоро" ўз уйида бир неча йиллик танаффусдан сўнг "Насаф"ни мағлуб этишни уддалади. Ҳимоячи Владимир Баенко қаршиликлар ҳужумчиларига етарли даражада қаршилик кўрсата олди.

"Шўртан" ўз майдонида "Динамо"дан устун келган баҳсда жамоа ҳимоячиси Обид Жўрабоев анчагина меҳнат қилганини таъкидлаш лозим. "Пахтакор"нинг "Нефтчи" устидан қозинлан йирик ғалабасида чап қанот ҳимоячиси Владимир Козакнинг хиссаси катта бўлди.

"Қўқон-1912" ўз уйида олий лига аутсайдери "Обод"ни мағлуб этди. Ягона гол ярим ҳимоячи Жавоҳир Сидиқов ҳисобига ёзилди.

Худди шундай вазият "Бунёдкор" - "Олмалиқ" учрашувида кузатилди. Отабек Шукуровнинг голи "қалдирғочлар"га 3 очко келтирди.

Бразилиялик Тиаго Безерра "Пахтакор" сафидаги илк ўйинда "Қизилқум" дарвозасига пенальтидан гол ура олмагач танқидлар остида қолиб кетганди. Бироқ "Нефтчи" билан ўйинда у ўзини анчагина яхши томонлама кўрсатди ва икки бор гол уришга эришди. "Навбаҳор" сардори Дилшод Жабборов "Қизилқум"га қарши ўтган оғир ўйинда доимгидек фаол бўлди ҳамда пенальтидан тўп киритишга ҳам эришди.

"Бухоро" "Насаф"ни мағлуб этишига Жавоҳир Қаҳрамоновнинг голи сабабчи бўлди. Ярим ҳимоячи бу ўйинда жуда фаол ўйнади.

"Локомотив" ҳужумчиси Марат Бикмаев мавсумда ўзининг тўртинчи дублини "Сўғдиёна" билан баҳсда қайд этди. Унинг биринчи урган голи жуда чиройли чиқди.

championat.asia талқинига кўра 17-турнинг рамзий терма жамоаси

Дарвозабонлар:
Жавоҳир Илёсов ("Машъал")

Ҳимоячилар:
Владимир Баенко ("Бухоро")
Обид Жўрабоев ("Шўртан")
Искандар Шойқулов ("Машъал")
Владимир Козак ("Пахтакор")

Ярим ҳимоячилар:
Жавоҳир Сидиқов ("Қўқон-1912")
Отабек Шукуров ("Бунёдкор")
Тиаго Безерра ("Пахтакор")
Дилшод Жабборов ("Навбаҳор")
Жавоҳир Қаҳрамонов ("Бухоро")

Ҳужумчи:
Марат Бикмаев ("Локомотив")