Олий лига. “Бухоро” бу турда ғалаба қозона оладими?

Бухоро вилоятининг бош жамоаси “Бухоро” бугун ўз майдонида Жиззахнинг “Сўғдиёна” клубини қабул қилади. Айни пайтда ҳар икки жамоа кетма-кет ўринларда боришяпти. “Бухоро” 13 очко билан 12-ўринда бораётган бўлса, “Сўғдиёна” 11 очко тўплаган ҳолда 13-поғонани эгаллаб турибди.

Иккинчи давра бошланганидан бери “Бухоро” ҳозирча тўртта учрашув ўтказиб, бирорта ғалабага эриша олмади. Жамоа уч марта сафарда ва бир бор ўз майдонида майдонга тушди. Умуман олганда, бухороликларнинг олий лигада ғалабасиз серияси 12та учрашувга етди. Жамоа охирги бор 5-турда сафарда айнан бугунги рақиб “Сўғдиёна” устидан 1:0 ҳисобида зафар қучганди.

Шундан кейин “Бухоро” учун омадсиз кунлар бошланди. Жамоа атиги тўрт марта дуранг қайд этди ва қолган беллашувларда мағлуб бўлди. Бу эса клуб раҳбариятига маъқул келмади ва ўтган турда жамоа “Металлург”га имкониятни бой бергач, бош мураббий Эдгар Гесс истеъфога чиқарилди. Шу боис бугунги баҳсга футболчиларни туркманистонлик мураббий Сеид Сеидов тайёрлади. Аммо шуни айтиш лозим, Сеид Юсупов вақтинча бош мураббий сифатида ишлаб турибди. Гап-сўзларга қараганда, “Машъал”да ёрдамчи мураббий бўлиб ишлаётган Жамшид Саидов “Бухоро”ни қабул қилиб олиши мумкин экан.

Бугунги баҳс “Бухоро” учун қанчалик катта аҳамиятга эга бўлса, “Сўғдиёна” учун ҳам жуда муҳим ҳисобланади. Чунки Даврон Файзиев шогирдлари рақибдан атиги бир поғона пастда боришмоқда, бу жамоаларни икки очко ажратиб турибди, холос. “Сўғдиёна” иккинчи даврада ҳозирча фақат бир марта ғалаба қозонди. Жиззахликлар сафарда “Динамо”ни мағлуб этиб қайтишди. Шундай экан, бу беллашувда ҳар нарса бўлиши мумкин. Лекин шуниси борки, ютуққа эришган жамоа олий лигада қолиш учун қулай имкониятга эга бўлади.

Х.Холиқов.