UZ

Нима бўлганда ҳам бу йил регламентга тегилмаслиги керак Янгиликлар

Нима бўлганда ҳам бу йил регламентга тегилмаслиги керак

Теглар :  ПФЛ Регламент
Сал аввалроқ Шаҳбоз Беғамовнинг "Янги ПФЛ эски хатоларни тозалашни бошлади: Энди навбат мантиқсиз ва носоғлом рақобатни юзага келтираётган регламентга!(ми?)" сарлавҳали мақоласи чиқди.

Мақола муаллифи янги келган ПФЛ раҳбарияти амалга оширган илк ўзгариш - ўйин пайтида мураббийларга мажбуран белгиланган дресс-коднинг бекор қилинишини мисол келтирган ҳолда яна бошқа бир нечта масалага эътибор қаратган. 

Футболда фикрлар қарама-қаршилиги бўлгани яхши, бусиз футбол ривожланмайди. Лекин шуни унутмайликки, футбол конституцияси бу - Регламент. Ҳар бир мусобақа учун мавсум аввалида янги регламент ишлаб чиқарилади ва мавсум якунига қадар шу бўйича иш олиб борилади. 

Биз бу йилги регламентга холис баҳони фақат мавсум тугаганидан сўнг беришимиз мумкин. Яна шуни айтиш лозим, ПФЛнинг аввалги раҳбарияти ҳам ўзбек футболи ривожи учун қўлдан келганча ишлади ва бундан кўз юмиб бўлмайди. Ички чемпионатимиз озми-кўпми ислоҳ қилинди, бир қатор янгиликлар қўшилди, майдонлар ҳолати яхшиланди, клублар ҳар жабҳада ўсишга эришишди ва ҳоказо. 

Энди дресс-код масаласига келсак, бу нарса мураббийлар учун ортиқча бошоғриқ эди дея олмаймиз. Нима бўлганда ҳам бош мураббийнинг захира ўриндиғидагилардан ажралиб тургани маъқул. Кимдир футболга биринчи марта тушади ва шунда бош мураббий кимлигини дарров пайқаб олади. 

Вадим Абрамовнинг иссиқда галстук тақишнинг нима кераги бор дейиши ўринли, бироқ ўйин 20:00да бошланганида ўйлаймизки, Абрамов бундай демаган бўларди. Умуман олганда дресс-код (костюм-шим, галстук) эътиборга арзигулик муаммо эмас ва буни бекор қилган билан нимадир ўзгариб қолмайди. 

Энди Регламентдаги бошқа бир банд - 1997 йил ва ундан кейин туғилган футболчининг камида 45дақиқа Суперлигада ўйнатилишига келсак, бу мураббийлар иштирокида ҳал қилинадиган масала. Балки ҳозир бу ўзгариш фойда бераётгандир. Тўғри, олимпия терма жамоамиз ёшига мос келадиган футболчини мажбуран ўйнатиш соғлом рақобатга таъсир қиляпти, лекин айнан шунинг келажакда ўз фойдаси тегиши ҳам мумкин. 

Ўйламизки, ПФЛнинг ҳозирги раҳбари олдида биринчи навбатда келаси мавсум учун чиқариладиган регламент устида иш олиб бориш турибди. Чунки бу йил учун регламент чиққан ва ҳамма шунга мос ўз ўйинларни ўтказиб келяпти. Қолаверса, мавсум якунига етмай регламентни ўзгартириш аввалги раҳбарият хатосини такрорлаш бўлиб қолади. Шундай экан, бу йилги мавсумни қўлимизда бор қоидаларга асосан ўтказиб олган маъқул деган фикрдамиз.

Х.Холиқов. 

Рейтинг: +15   

Фикрлар

championat.asia
< сўнгги янгиликларни кўриш
Яндекс.Метрика

CA ни Facebook да ўқиш
учун "Yoqdi"ни босинг