"Навбаҳор": Тошкент йиғини бошланди

Футболчилар бугун дастлабки машғулотни якунлашди. Шу ўринда таркибда айрим ўзгаришларни рўй берганлигини эътироф этиш жоиз. Наманганда ўтказилган машғулотда қатнашган ҳимоячи Аҳрол Рисқуллаевга мураббийлар жавоб беришди. Тошкентда эса сафга Тимур Яфаров, Шавкат Насибуллаев ва Элёр Жаҳонов қўшилишди. Яфаров ўтган мавсумнинг иккинчи қисмини “Навбаҳор”да ўтказганидан хабарингиз бор. Насибуллаев ҳамда Жаҳонов ҳам жамоага бегона эмаслар. Ушбу футболчилар фаолиятлари давомида “Навбаҳор”да тўп суришга улгуришган. Насибуллаев 2013 йилги чемпионатни “Нефтчи”, Жаҳонов эса “Гулистон”да ўтказганди. Тошкентдаги йиғин давомида таркибда яна янги ўйинчилар қўшилади.

Жамоа Тошкентдаги дастлабки йиғин давомида ўртоқлик учрашувларида майдонга тушишни режалаштирган. Хусусан, 29 январь куни "Навбаҳор" Бекободнинг “Металлург” клуби билан баҳс олиб боради. 2 февралда эса Муборакнинг “Машъал” жамоасига қарши ўйин бўлиб ўтади. Пойтахтда ўтадиган машғулотларнинг дастлабки қисми 2 февраль куни якунланади. Жамоа аъзоларига икки кунлик таътил эълон қилингач, машғулотлар яна пойтахтда давом эттирилади. Йиғин давомида “Навбаҳор” ПФЛ кубогида иштирок этади.