"Насаф" ва "Бунёдкор" Ўзбекистон кубогида қандай иштирок этишган?

Қаршининг “Насаф” клуби кубокда бир текисда иштирок эта олмайдиган клублар сирасига киради. Сабаби сўнгги йиллардаги натижаларга эътибор қилсак гоҳ 1/8 финалда курашдан чиқса, гоҳ финалгача етиб келади. Аммо охирги икки йилда клуб финалга қадар етиб боргани, бу йил ҳам ҳал қилувчи ўйинда майдонга тушишини алоҳида таъкидлаш лозим. Клуб уч марта Ўзбекистон кубоги финалида майдонга тушган. Дастлабки иккисида “Пахтакор”га, ўтган йили эса “Бунёдкор”га имконият бой берилган. “Насаф” 6 марта 1/8 финалда, 4 мартадан 1/4 ва 1/2 финалда тўхтаган. 90-йиллар ўрталарида икки марта кубокнинг дастлабки босқичи улар учун сўнгги манзил бўлган. Эртага “аждарлар” финалда кетма-кет учинчи бор майдонга тушишади.  

Ташкил этилганига у қадар кўп бўлмаган “Бунёдкор” клуби Ўзбекистон миллий чемпионатидан ташқари кубогида ҳам анчайин муваффақиятли тарзда иштирок этиб келмоқда. Клуб фақат дастлабки мавсумда 1/16 финалда курашдан чиққан. Шундан сўнг бўлиб ўтган 4 мавсум давомида “Бунёдкор” кетма-кет равишда финалларда иштирок этган. Икки марта Ўзбекистон кубогида зафар қучиш (“Пахтакор” ва “Шўртан”ни енгиб) насиб этган бўлса, қолган иккита финалда “Пахтакор”га имконият бой берилган. 2011 йилги мавсумда эса ушбу анъана барҳам топди. “Насаф” ярим финалда “Бунёдкор” йўлига тўғаноқ бўла олганди. Ўтган йил эса “қалдирғочлар” “аждарлар”дан бир йил олдинги ярим финалдаги мағлубият аламини олишди – 3:0.
 

 Нарзулла Сайдуллаев.