"Насаф" ўртоқлик ўйинида ғалаба қозонди, жамоага Абрамов келган

Қаршининг "Насаф" ҳамда Бекободнинг "Металлург" жамоалари ўртасида кечган ўртоқлик ўйинида биргина гол баҳс тақдирини ҳал этди. Учрашувнинг 2-дақиқасида "Насаф"нинг марказий нуқтадаги универсал футболчиси саналган Ғолиб Ғайбуллаевнинг голи "аждарлар"га ғалаба келтирди.

Шуни қайд этиш керакки, "Насаф" сафида ушбу баҳсда бир қатор ёшлар ва кўрикдан ўтаётган янги легионер футболчи майдонга тушган. "Насаф"га ўз хизматларини таклиф этган россиялик ҳужумчи Николай Абрамов захирадан майдонга тушди. Ҳозирча ушбу футболчи жамоада кўрикда бўлиб турибди.

Ўзбекистон олимпия терма жамоасига кетган Умид Эргашев, Азиз Ғаниев, Одил Ҳамробеков, Ислом Кенжабоев ва Бобир Абдихолиқов эса яқин кунларда жамоа лагерига келиб қўшилишади.

"Насаф" эртага Тошкентда норматив тестларни топширади.

"Насаф"нинг спарринг рақиби бўлган "Металлург" жамоасида сафида ҳам бир қатор ўзгаришлар руй берган. Хусусан жамоа таркиби "Пахтакор"дан келган Станислав Андреев, "Нефтчи"да мавсумни бошлаган Аваз Агалиев, "Қўқон-1912"да ўйнаган Баҳодир Пардаев ва АГМКда тўп тепган Отабек Зокировлар билан бойитилган.

Ўртоқлик учрашуви.

"Металлург" - "Насаф" 0:1

Гол: Ғолиб Ғайбуллаев (2)

"Насаф": Санжар Қувватов (Машҳуржон Муҳаммаджонов, 80), Сайдулло Раҳматов, Мақсуд Каримов, Ғолиб Ғайбуллаев, Дилшод Саитов, Умар Эшмуродов, Акмал Мозговой, Шароф Муҳитдинов, Бобир Давлатов (Худоёрхон Саъдуллаев, 77), Ислом Рашидхонов (Сардор Саъдуллаев, 84), Шерзод Темиров (Николай Абрамов, 62).