"Насаф" - "Нефтчи" учрашувига оид фактлар

- Фарғонанинг "Нефтчи" жамоаси устидан қозонилган ғалабадан сўнг жамоамиз турнир жадвалидаги учинчи ўрнини мустаҳкамлаб олди ва энг яқин таъқибчилари "Нефтчи" ва "Бунёдкор"дан 9 очкога илгарилаб кетди.

- Ушбу ғалаба "Насаф"нинг олий лига доирасидаги "Нефтчи" устидан қозонган 15 ютуғи бўлди ва бу борада фарғоналикларга етиб олинди.

- "Насаф" шу пайтга қадар фақат 2010 ва 2013 йилги мавсумларда "Нефтчи"дан ҳар иккала ўйинда устун келган. 2010 йилги мавсумда дастлабки ғалабага жамоамиз Виктор Кумиков қўл остида эришган бўлса, иккинчи даврадаги ғалабани Анатолий Демяненко бошчилигида қўлга киритилганди. Рўзиқул Бердиев эса ўтган мавсумда ҳар иккала ўйинда ютуққа эришган дастлабки мураббийга айланганди. Бу йилги мавсумда ҳам ўша натижа такрорланди ва бу борада Рўзиқул Бердиев шахсий рекордини янгилади.

- Жамоамиз Рўзиқул Бердиев бошчилигида "Нефтчи" жамоасига умуман мағлуб бўлмаган. Шу пайтга қадар ўтказилган олтита учрашувнинг бештасида "аждарлар" ғалаба нашидасини суришган бўлса, битта ўйинда дуранг қайд этилган.

- "Насаф" - "Нефтчи" жамоалари ўртасидаги миллий чемпионат доирасидаги баҳслардаги тўплар нисбати вакилларимиз фойдасига - 48:46.

- Элдор Суюнов ушбу мавсумда "Нефтчи" жамоасидан ҳар иккала ўйинда ҳам гол ўтказмади.

- Ушбу мавсумда "Нефтчи"ни ҳар иккала ўйинда ҳам мағлубиятга учратган ягона жамоа ҳозирча "Насаф" бўлиб турибди.

- Илҳом Шомуродовнинг "Нефтчи" дарвозасига киритган тўпи ҳужумчимизнинг бу йилги мавсумда олий лигадаги 10-голи бўлди ва бу борада Илҳом жамоамизнинг энг яхши тўпурари Артур Геворкянга етиб олди.

- Олий лиганинг 25-туридан сўнг энг кам гол ўтказиб юборган жамоа "Насаф" бўлиб турибди. Жамоамиз шу вақтга қадар ўз дарвозасидан 16 маротаба гол ўтказиб юборган. Бу кўрсаткич бўйича иккинчи яхши натижа "Локомотив"га тегишли. Улар ҳозиргача 24 ўйинда иштирок этишган ва жами 17та голни қабул қилиб олишган.