"Насаф" "Нефтчи" билан ўйинга жиддий тайёрланмоқда (ФОТО)

Рўзиқул Бердиев бошчилигидаги "Насаф" жамоасини 10-турда қийин синов кутмоқда. "Аждарлар" навбатдаги ўйинни сафарда чемпионат пешқадами бўлиб турган "Нефтчи"га қарши ўтказишади.

Кеча кечқурун жамоа ўз қароргоҳида машғулот ўтказди ва кечки рейс орқали Тошкентга парвоз қилди. "Насаф" делегацияси бир кунни пойтахтда ўтказишади ва эртага Фарғона томон отланишади.

Биз "аждарлар"нинг "Нефтчи"га қарши ўйини олдидан ўз қароргоҳларида ўтказган сўнгги машғулотини кузатиб бордик.

Машғулот олдидан барча футболчилар 10-15 дақиқа персонал равишда ишлашди. Кейинчалик барча футболчилар бир гуруҳ бўлиб югуришди.

Фақатгина "Насаф"нинг чап қанот ҳимоячиси Ботир Қораев якка тартибда шуғулланди.

Машғулотларга одатдагидек жамоа бош мураббийи Рўзиқул Бердиев бошчилик қилди. Унга ёрдамчи мураббийлар Шуҳрат Тошпўлатов ҳамда жисмоний тайёргарлик бўйича мураббий Илнур Сибагатуллин кўмаклашишди.

Дарвозабонлар мураббийи Денис Иванков эса ўз шогирдлари Элдорбек Суюнов, Ўткир Юсупов ҳамда Алибек Туроповларни шуғуллантирди. 

Футболчилар Фарғонадаги баҳсга жиддий ҳозирлик кўришаётгани машғулотларда сезилиб турди.

Қуйида машғулотлардан олинган суратларни томоша қилишингиз мумкин.

Фото: Сардор Нуров

Шаҳбоз Беғамов