“Насаф” жамоаси таркиби янгиланиш арафасида

“Насаф” футбол клуби таркибни шакллантириш бўйича ўзининг узоқни кўзлаган режасига эга. Бу режанинг асосий мақсади – ёш футболчиларга кўпроқ эътибор беришдир. Қашқадарё Вилоят Футбол Федерацияси Президенти ҳамда клубимиз Президенти томонидан ҳам бу режа қўллаб-қувватланмоқда. Бу мақсадларни амалга ошириш бундан буён ҳам давом эттирилади. Шундан келиб чиқиб, иккинчи даврада ҳам таркибимизни тарк этган ўйинчилар ўрнига мана шундай ёш тарбияланувчиларимиз ҳисобидан тўлдирилади. Албатта, бу “Насаф” таркибида фақат ёш футболчилар ўйнайди деган, фикрни пайдо  қилмаслиги керак. Жамоамизда улар қаторида тажрибали футболчилар ҳам бўлади.
 
Клуб қошида футбол мактаби фаолият юритмоқда ва бунда кўплаб ёш иқтидорли футболчилар вояга етишмоқда. Бунга мисол тариқасида мактабимиз тарбияланувчиларидан кейинги йилларда мамлакатимизнинг ёшлар  терма жамоасига таклиф олаётганини айтиб ўтиш жоиз. Бундан ташқари улардан кўплари айни пайтда асосий таркибимизда фаолият олиб бориб, мухлисларнинг олқишига ҳам сазовор бўлишмоқда.
 
“Насаф” жамоасининг кейинги учрашувлардаги муваффақиятсизлиги сабабларидан бири – жамоамизнинг бир қанча етакчи футболчиларининг учрашувлар пайти олган жароҳатлари бўлди. Бундай футболчиларга Мақсуд Каримов, Шерзод Аъзамов, Дилшод Раҳматуллаев, Шуҳрат Муҳаммадиев, Сайдулло Раҳматовларни мисол келтириш мумкин.
 
Жамоамиз шифокорлари шу кунларда уларнинг сафга қайтиши учун катта ишларни амалга оширишмоқда.
 
Шундай экан, клубимиз ишқибозлари бизни тўғри тушунишади деган, умиддамиз. “Насаф” футбол клуби ўз олдига қўйган юқори мақсадлар учун курашни давом эттираверади.