Миржалол Қосимов: "Бугунги ғалаба жамоага руҳий томонлама ёрдам беради"

"Дастлабки иккита ўйиндан кейин очкога эга эмасдик, руҳий жиҳатдан босим остида қолгандик. Ушбу ғалаба бизга руҳан ёрдам беради деб ўйлайман. "Сурхон" жамоаси охиригача курашади. "Олимпик" ва "Навбаҳор"га қарши баҳсларда бугунги рақибимиз сўнгги сонияларгача ўйнашди, шунга тайёргарлик кўргандик. Узун паслар билан ўйнашини билардик, яккакурашларга катта эътибор қилишди. Ғалаб осонликча қўлга киритилмади", - дейди Миржалол Қосимов. 

- Анзур Исмоилов ва Алишер Жалиловдек футболчиларнинг захирада қолиши бу уларнинг жисмоний ҳолати билан боғлиқми ёки рақобат биланми? 

- Исмоилов Туркияда елкасидан жароҳат олганди. Бекободдаги ўйинда икки футболчимиз жароҳатланган, икки футболчимиз қизил карточка олганди. Санжар Турсунов ҳам ҳали тўлиқ тайёр эмас. Анзур бугун илк бор майдонга тушди. Жалилов куни кеча Намангандаги халқаро мусобақада терма жамоа сафида майдонга тушганди. Шу боис бугун захирадан майдонга туширгандим. 

- Тажрибали мураббий сифатида нима деб ўйлайсиз: Ўзбек футболида VAR'даги баҳсли вазиятларни кўриш учун жуда кўп вақт кетмаяптими? 

- Бу танганинг бир томони, бошқа томони эса ҳар бир ўйин жанговар тарзда ўтмоқда, ҳеч ким ютқазгиси келмаяпти. Мана шу боис шундай ҳолат кузатилмоқда. Лекин дунёдаги янгиликлар билан ҳамнафас бўлиш керак. Тўғри VAR'ни янада такомиллаштириб, қарорни тезроқ қабул қилинса бунинг зарари йўқ. 

- Сизнинг жамоангизда пенальтини ким тепишини ким ҳал қилади? 

- Ўйиндан олдин ўзим тайинлайман. Қўлимдаги қоғозда барчаси ёзилган.