"Месси – тарихдаги энг яхши футболчи" — Лионель Скалони

Жанубий Америка вакилини Қатардаги мундиалда жаҳон чемпиони унвони томон етаклаган Скалони "El Partizado" дастурида берган интервьюсида Аргентина футболи тарихидаги энг буюк икки футболчини солиштирди ва ўзи учун қайси бири яхшироқ эканини айтди:

"Мен учун Месси – тарихдаги энг яхшиси. Марадона буюк эди. Лекин мен Мессини ўзгача, деб ҳисоблайман".

ПСЖ футболчиси Қатардаги Жаҳон чемпионатида Аргентинани 36 йиллик танаффусдан сўнг чемпионлик совринини ўз мамлакатига қайтаришда улкан ҳисса қўшди. У финалда аввалги мундиал чемпиони Франция дарвозасига иккита гол урди ва пенальтилар сериясидаги ижросини ҳам хотиржамлик билан амалга оширди. Месси чемпионатда 7 та ўйинда ажойиб 7 та гол ва 3 та голли узатмани амалга оширди ва турнирнинг "Олтин тўп" совринини қўлга киритди. 

Аргентинанинг бундан олдинги чемпионлиги 1986 йилда Диего Марадонанинг ажойиб ҳаракатлари туфайли қўлга киритилган эди. Шу туфайли бир неча йиллардан буён бу икки афсонани солиштирганда Марадонанинг қўли баланд келар эди. Етти карра "Олтин тўп" соҳиби бу совринга ҳам эга чиққач вазият бироз ўзгаргандек.

Месси айни вақтга қадар Скалони қўл остида 44 та ўйинда иштироқ этди ва 32 та гол урди.