Максим Шацких: "Бугунги учрашувдан мухлисларнинг кўнгли тўлди, деб ўйлайман"

"Бугунги учрашувдан мухлисларнинг кўнгли тўлди, деб ўйлайман. Биз доим улар учун тўп тепамиз. Ўйинга келсак, голлар ҳам, вазиятлар ҳам етарли бўлди. Икки жамоа дарвозаси олдида кескинлик юқори кечди. Ўйинни муваффақиятли якунладик. Хатоларимиз йўқ эмас. Ишлашда давом этамиз", - дейди Максим Шацких. 

- Қишда амалга оширилган трансферлардан кўнглингиз тўлдими?

- Жамоамизга қўшилган футболчилардан қониқдим. Ҳозирча бизда таркиб шундай. Ёзда яна таркиб тўлдирилади. Бу босқичда оладиган футболчиларимизни олдик. 

- Бугунги учрашувда кўп гол кутганмидингиз?

- Бундай голларга бой ўйинни ҳеч қайси мураббий кутмаслиги табиий. Боз устига мавсум стартида турибмиз. "Қайрат"ни ўрганган эдик. Улар бугунгидек ўйин кўрсатишини кутгандим. Қайсидир жойда агрессив ҳолда прессинг қилишди. Рақиб сафидаги ҳужумчи яхши ҳаракат қилди. Катта тезлик, вазиятни ҳал қила олиш каби устун томонлари бор экан. "Қайрат" мураббийи билан гаплашдим. Ёш мутахассис. Умуман олганда бугун фаол футбол кўрсатдик, дея оламан. Қолаверса, "Қайрат" ҳам маъқул келди.