- Ўйин ҳақида фикрингиз?
- Мавсум охирларига келиб ўйинларни ўтказиш психологик томондан қийин бўлди. Бугун ҳам қийин баҳсни ўтказдик. Шунга қарамай йигитларга раҳмат, ижобий натижани қўлга киритдик. 3:0 ҳисоби ўйин қандай кечганини айтиб турибди. Икки даврали чемпионат тугади, бу билан барчани табриклайман. Лекин биз учун ҳали мавсум тугагани йўқ. Энди ўтиш ўйинларида иштирок этамиз. Ижобий натижа томон ҳаракат қилишда давом этамиз. Олдимизга вазифа қўйилган, шу вазифани бажариш устида иш олиб борамиз.
- Чиройлилик жиҳатдан қайси голни эътироф этасиз: иккинчи голними, учинчи голними?
- Мен учун ҳар учала голимиз чиройли бўлди. Биринчи гол жамоамизга енгиллик берди. Иккинчи гол босимни олиб ташлади. Учинчи гол эркинлик сабаб юзага келди. Шунинг учун барча голлар мен учун муҳим.
- Ўтиш ўйинларига "Шўртан" қанчалик тайёр?
- Мақсадимиз Суперлигага чиқиш, шунинг учун астойдил тайёргарлик кўряпмиз. Рақиб танламаймиз, ким рақибимиз бўлмасин, ҳурмат қилган ҳолда ўз ўйинимизни кўрсатишга ҳаракат қиламиз.
- "Арал"муддатидан олдин вазифани ҳал этди. Мавсум бошларида "Шўртан" ҳам "Арал" билан ёнма-ён бораётганди. Сизнингча, "Арал"даги қайси жиҳатлар "Шўртан"га камлик қилди?
- Мен олти-еттита учрашувдан бери жамоани бошқариб келаётган бўлсам, балки ўйинга тайёрлаш борасида озгина кам ишландими. Қайсидир баҳсларда ўз имкониятларимиздан тўлиқ фойдалана олмадик. Биз уйда ва меҳмонда икки хил ўйин намойиш этдик. "Арал" эса мавсумни бир текис ўтказиб, шунинг учун чемпион бўлди.
- "Шўртан" аввалги мавсум ҳам Суперлигада иштирок этиб, кейин тушиб кетганди. Бу ҳолат клубга дарс бўлган бўлса керак?
- Бу саволга анча чуқур жавоб беришга тўғри келади. Шуни айтишим мумкин, "Шўртан"нинг ўз тарихи бор. Биз нафақат ички чемпионат, балки Осиё Кубокларида ҳам қатнашганмиз. Агар Суперлигага чиқсак шунчаки қатнашмоқчи эмасмиз. Жамоа олдига барибир мақсад қўйилади ва шунга қараб интиламиз.
