Максим Шацких: "Англия премьер-лигасининг 3та клубидан чорлов бўлганди..."
17 май 2020 16:00
Янгиликлар

Максим Шацких: "Англия премьер-лигасининг 3та клубидан чорлов бўлганди..."

Европада, аниқроғи Украинда муваффақиятли тўп тепган ҳамюртимиз Максим Шацкихга ўз вақтида Англиянинг номдор клублари жиддий қизиқиш билдирганди.

Жисмоний жиҳатдан бақувват футболчимизнинг услуби топ беш чемпионатларига бемалол тортарди. Нима учун кучли лигалардан тушган таклиф шундайлигича қолиб кетди? Бу ҳақда Шацких “Тезкор Студия”да жавоб берди.

“Кўпчилик ўйлагандек "Вест Бромвич"дан эмас, “Ньюкасл”, “Вест Хэм” ва “Тотенхем"дан таклифлар келиб тушганди. Биз Чемпионлар Лигасида “Ньюкасл” билан ўйнагандик, ўшанда ушбу жамоани Бобби Робсон бошқарарди. Шундан сўнг мени дарҳол қўлга киритишмоқчи бўлишган. Нима учун трансфер содир бўлмаган? Бу саволни Киев клуби раҳбариятига берганингиз маъқул. 2007 йилда “Галатасарой” жамоасидан ҳам чорлов олганман. Яхши сумма тўлашмоқчи бўлишган. Ўшанда “Динамо” президенти чақиртириб, бу менинг даражамга мос эмаслигини айтганди”, - деб хотирлайди Шацких.

Маълумот ўрнида айтиш жоизки, Чемпионлар Лигасининг 2002 йилги мавсумида “Динамо Киев” ўз майдонида “Нюькасл”ни қабул қилади. Майдонда 16-рақамда ҳаракат қилаётган Шацких учрашувнинг 16-дақиқасида Шей Гивен қўриқлаётган дарвозани юқори бурчагини аниқ нишонга олади. Кейинчалик бу голга “The Independent” нашри “World class” дея баҳо берганди.

Видео. Бир ўйин тарихи. "Динамо" - "Ньюкасл" ёхуд Шацкихнинг ўша машҳур голи