"Локомотив" ўз майдонидаги охирги тўртта ўйинда 15та гол урди

"Темирйўлчилар" 13та ўйиндан сўнг 32 очко тўплашди ва турнир жадвалида якка пешқадамлик қилишмоқда.

Куни кеча бу жамоа ўз майдонида "Динамо"ни қабул қилиб, 2:0 ҳисобида ғалаба қозонди. Шу тариқа "Локо"нинг уйдаги ғалабалари сони еттитага етди. Бундан ташқари, "Локомотив" ТТЗдаги стадионда кетма-кет тўртинчи ўйинида гол ўтказмади. Ва мана шу тўртта учрашувда "Локо" футболчилари 15та гол уришнинг уддасидан чиқишди.

"Локомотив" охирги тўрт ўйинида "Обод" (7:0), "Қизилқум" (2:0), "Нефтчи" (4:0) ва "Динамо" (2:0) клубларини мағлуб этди. Мавсум бошидан бери "темирйўлчилар" уйдаги ўйинларда жами 25та тўп киритиб, ўз дарвозаларидан атиги битта гол ўтказиб юборишган. "Локомотив" фақат "Насаф" билан кечган ўйинда гол ўтказган.

Шундай қилиб, "термирйўлчилар"нинг биринчи давра ҳисобидан уйдаги ўйинлари ўз якунига етди. Жамоа кейинги турни сафарда "Бунёдкор"га қарши ўтказади.