"Ливерпуль" Конате билан янги шартнома бўйича келишувга эриша олмаяпти, футболчига "Реал" қизиқиш билдирмоқда

Ҳозирда томонлар ўртасидаги музокаралар боши берк кўчага кириб қолган. Бу ҳақда Caught Offside хабар бермоқда.
Манба маълумотларига кўра, франциялик футболчи ҳафтасига 200 минг фунт стерлинг миқдорида маош талаб қилмоқда, бироқ мерсисайдликлар бундай суммани тўлашга тайёр эмас. Агар Конате билан янги меҳнат шартномаси ёз охиригача тузилмаса, Англия чемпиони 26 ёшли ҳимоячини 50-60 миллион еврога сотишга рози бўлади. Ўйинчига "Ал Ҳилол," "Бавария," "Реал" ва "Пари Сен-Жермен" клублари қизиқиш билдирмоқда.
Конате ўтган мавсумда барча мусобақаларда 42 та ўйинда иштирок этиб, 2 та гол урди ва 2 та голли узатма берди. Футболчининг клуб билан амалдаги меҳнат шартномаси 2026 йил ёзигача мўлжалланган. Transfermarkt сайти маълумотларига кўра, футболчининг бозор қиймати 60 миллион еврони ташкил этади.