“Лестер” эгаси жойлашган вертолётнинг ҳалокат сабаби маълум қилинди
28 окт 2018 07:22
Янгиликлар

“Лестер” эгаси жойлашган вертолётнинг ҳалокат сабаби маълум қилинди

Хабар берганимиздек, кеча Англиянинг “Лестер” клуби хўжайини Вичай Шриваддханапрабх жойлашган вертолёт ҳалокатга учраган эди.

“Лестер” кеча Англия Премьер-лигаси 10-тури доирасидаги учрашувда “Вест Хэм” клубини қабул қилиб, дуранг (1:1) қайд этди. Айнан мана шу ўйин якунланганидан сўнг клуб хўжайини одатдагидек ўз вертолётида уйга қайтишга тараддуд кўради.

Вертолёт ҳавога кўтарилганидан бир неча сония ўтиб, “Кинг Пауэр” стадиони ёнидаги автомобиллар турар жойига қулайди. BBC берган хабарга таянсак, ҳалокатга вертолётнинг дум қисмидаги винтнинг ишламай қолгани сабаб бўлган.

Британия матбуотида тарқатилган хабарларга кўра, “Лестер” президенти вертолёт бортида бўлган ва у вафот этган. Ҳозирча расмий хабар берилмаяпти. Шриваддханапрабха 2010 йилда “Лестер”ни харид қилган эди. Жамоа мавсум-2015/16да ўз тарихида илк бор Англия чемпиони бўлганди.