Куртуа Месси пенальтини қандай амалга оширишини билган?

"Биз кучли рақибга қарши унинг майдонида тўп тепдик. Ўйинни ёмон бошламадик, бироқ тўп билан кўнгилдагидек муомалада бўла олмадик ва бунинг оқибатида зарар кўрдик.

Оддий вазиятда тўпни йўқотдик ва Мбаппе икки футболчининг орасидан ўтиб, ердан зарба берди. Зарба учун қулай вазиятга қараб чиқиб келаётган рақиб учун дарвоза соҳасини имкон қадар тўсдим, лекин аламли гол ўтказиб юбордим. Буни қабул қилиш осон эмас, аммо умумий олиб қарасак, биз ёмон ўйин ўтказдик. Хафамиз, лекин олдинда жавоб ўйини бор ва ҳали ҳеч нима ҳал бўлмади.

Бугунгидек ўйинларда дарвозабон одатдагидан кўпроқ тер тўкиши талаб қилинади. Мен "Атлетико"да ўйнаган вақтларимдан бери Мессига қарши майдонга тушаман ва унинг пенальтини қандай тепишини кузатиб бораман. Лео нуқтадан кўпинча тўпни айнан шу бурчакка йўллайди (аргентиналик охирги 5та пенальтидан 4 тасида тўпни ўзидан ўнг пастки буракка йўллаган. изоҳ - Championat.asia). Чизиқда узоқроқ туриб, уни чалғитишга уриндим.

Вазифа ўзгармади — ғалаба қозонишимиз зарур. Биз ўз майдонимизда, минглаб мухлисларимиз қўллаб-қувватлаб турадиган "Сантьяго Бернабеу"да рақибни кутиб оламиз", - деди Тибо Куртуа.

Аввалроқ, бельгиялик посбон бу учрашувда рекорд ва бир нечта эътиборга лойиқ натижалар қайд этгани ҳақида хабар бергандик.