"Краснодар" ПФК Павел Мамаев бўйича расмий баёнот берди

Гап шундаки, кеча "Зенит" ҳужумчиси Александр Кокорин ва "Краснодар" ярим ҳимоячиси Павел Мамаев ўртоқлари билан маст ҳолда тунги клубдан чиқишган ва безорилик қилиб кўчада турган машиналарни тепа бошлашган. Мана шундай машиналардан бири "Мерседес" русумидаги автоулов бўлиб, "Биринчи канал" бошловчиси Ольга Ушаковага тегишли бўлган. 

Шунда машина ҳайдовчиси келиб ёшларга гап уқтиришни бошлаган ва жим юришларини сўраган. Бироқ футболчилар уни эшитмай дўппослашга тушишган. Футболчилардан бири унинг бошига ургани учун ҳайдовчи мия чайқалиши ташхиси билан касалхонга ётқизилган. Бундан ташқари иккала зўравон Москва кафеларидан бирида овқатланиб ўтирган мансабдор шахсни ҳам уришган. 

Бўлиб ўтган воқеалардан сўнг "Краснодар" футбол клубининг баёноти қуйидагича бўлди:

"Биз клуб футболчисига нисбатан жиноят иши очилган ҳолат билан биринчи бор рўбарў келдик. Видеода кўринган ҳолат ниҳоятда аянчли, бу ҳар қандай кишининг ғазабини келтиради. Шу боис бу вазиятни ҳеч қанақасига оқлаб бўлмайди. Клуб аввало юз берган воқеани тўлиқ ўрганиб чиқади ҳамда футболчининг шартномасида келтирилган бандлар бўйича иш кўради. Биз аввало футболчи билан шартномани қандай бекор қилиш ҳақида ўйлаяпмиз. Афсуски, шартномалар шундай тузилганки, уларнинг аксарияти профессионал футболчилар фойдасига хизмат қилади. Лекин клуб футболчига нисбатан жазо бериш учун бор имкониятини ишга солади".