Кўпчилик Осиё Кубоги-2023 мезбонлиги Ўзбекистонга берилишини хоҳлаяпти (Сўровнома якунлари)

Хабарингиз бор, келаси йил тақвим бўйича ОФК навбатдаги Осиё Кубогини ўтказиши керак. Лекин қитъамизнинг энг катта мусобақаси қайси мамлакатда ўтказилиши ҳамон аниқ бўлганича йўқ. Осиё чемпионатига Хитой мезбонлик қилиши керак эди, бироқ айрим сабабларга кўра, Хитой мезбонликдан воз кечди. 

Шундан сўнг ОФК барча аъзо мамлакатларга мезбонликни олиш бўйича расмий хат юборди. Катта эҳтимол билан шу йилнинг куз ойларида ОФК янги мезбон номини эълон қилиши керак. Осиё Кубоги тақвим бўйича 2023 йилнинг 16 июндан 16 июлга қадар бўлиб ўтиши белгилаб қўйилган. Бунда 24та миллий терма жамоа иштирок этади. 

Телеграм каналимизга "Осиё Кубоги-2023 мезбонлиги қайси давлатга берилгани маъқул?" мазмунида сўровнома қўйгандик. Бугун натижаларни эълон қиламиз.

Сўровномада вариант сифатида 9та мамлакат келтирилди: Қатар, Саудия Арабистони, БАА, Эрон, Ҳиндистон, Ўзбекистон, Япония, Жанубий Корея ва Австралия.

Энг кўп овозни табиийки Ўзбекистон тўплади. 16 мингдан зиёд мухлис сўровда иштирок этган бўлса, овоз берганларнинг 60 фоизи Ўзбекистонни танлаган. 

Биласиз, айни кунларида юртимизда U-23 Осиё чемпионати бўлиб ўтяпти. Албатта, ташкилий ишлар ОФКни қаноатлантираётган бўлса, қитъанинг энг нуфузли мусобақасини олиш олдинга ташланган жуда катта қадам бўлади. Фақат биз бунга тайёрмизми? Ҳамма гап шунда. 

Сўровномада кейинги ўринни 12 фоиз билан Қатар эгаллади. Япония ва Жанубий Корея 6 фоиздан овоз тўплаган бўлса, Саудия Арабистони 5 фоиз йиғди. Бошқа давлатлар эса анча кам овоз тўплаган. 

Энди савол ОФК Осиё Кубоги мезбонлигини Ўзбекистонга ишониб топширса, зўр қилиб ўтказа оламизми?